Tommy仔拍住林雪Rap　MC Jin忍唔住挑機

MC Jin最近「人氣翻身」，事關《中國有嘻哈》中有一個與他「非常相似」的參賽者Hip Hop Man，令觀眾重新留意呢個曾經Rap贏黑人嘅猛料Rapper。日前MC Jin專訪中提到在香港工作非常順利，音樂又有，幕前又有，原來有「港版G-Dragon」之稱嘅阮民安(Tommy)孖住林雪，同MC Jin都有合作過。

2010年作品《男士托》Tommy、林雪featuring MC Jin，Tommy有份作曲、編曲，仲做埋監製，難怪早前接訪問覺得自己懷才不遇，討厭俾人當冇料啦。話說回來，雖然林雪唱歌「充滿特色」，不過經常有唱歌表演機會，於《男士托》一曲中更包辦兩段Rap，又以莫華倫唱腔演繹真係意想不到。

MV中MC Jin都頂唔順Tommy仔同林雪亂咁嚟，忍唔住要突入「教路」示範何謂真正的Rap。

Rap歌詞：

「Tommy你叫我featuring得 但我聽你哋rap咁耐都唔知噏乜

我搵食係唔容易 你要我推咗份job嚟聽你哋傾心事?

你兩個真係好有感情 或者我未做過PTU所以唔明

我唔得閒陪你兩個癲 走之前 喂 肥雪哥影幅相先」

不過講真話永遠唔講得，所以MC Jin在MV中被當作瘋狂fans，更被工作人員拉走。其實《男士托》一曲都可以叫做滄海遺珠，皆因班底強勁，有MC Jin負責Rap、張繼聰、梁栢堅填詞；MV中又有o靚模Lavina大晒事業線，無論視覺、聽覺都係享受。