【專訪】不愛孖住夜蒲？ 連詩雅鄭融：我哋真係健康到不得了！
連詩雅和鄭融兩位女生，驟眼一看似是大纜都扯唔埋，外型不同、性格不同、衣著風格不同，連歌路也截然不同，旁人皆以為她們是沒可能的一對，怎料她倆卻跟大家宣佈：「我哋要一齊開騷啦！」是二人首個共同舉行的演唱會。
攝影：黃國立
Stephanie : Hay @ Hair Salon
Shiga : Louis @ Hair Culture
Shiga Wardrobe : ZIZTAR / voeuxhk
Venue : FITNEZ
問起她們這個演唱會因何而出現，Shiga表示：「其實我哋都識咗好多年，而大家都鍾意唱情歌，咁啱而家又同公司，所以呢個演唱會嘅出現都好突然。」而鄭融補充：「我覺得我哋兩個好有緣，因為我哋除咗同一間公司所以會認識之外，其實後來發現我哋分別未入行之前已經有好多共同朋友，大家會有更多共同嘅話題。今次開騷就終於有啲嘢係可以一齊做，將我哋兩個唔同時空做嘅音樂擺喺個音樂會度，而入場嘅觀眾又係兩個時空嘅人走埋一齊，其實件事好窩心。」
說起入行前的共同朋友，某程度上也能反映出她們二人的共通之處，鄭融直言：「有好多都係以前出去玩嘅時候認識，呢樣都令我哋發現自己嘅經歷好相似。因為我哋兩個初初入行嘅時候，都會有啲新聞話我哋成日會去蒲、會出去玩，但我哋互相認識嘅時候都已經發現大家原來成日匿喺屋企，好少再出去。」她更笑言：「Shiga成日都話估唔到大家都係識同一班人，我就講笑咁話『證明呢個世界好細，我哋做咩都要小心啲。』」
大家以為兩個女生聚頭便會像《Gossip Girl》般講是講非，Shiga反駁：「我哋嘅話題真係健康到不得了，最初認識嘅時候已經會一齊跑步做運動，又會去行街睇吓Outlet，更加會互相上大家屋企傾吓計，阿融經常都會鼓勵我畫返多啲畫，唔好放棄呢啲興趣。大家都會帶到正能量比大家。」原來私下她們就像電視劇中的閏密一樣，連對方逛街會買什麼也記得一清二楚，鄭融大爆：「Shiga有好多嘢都會令佢著迷，食物啦、粉紅色嘅嘢啦、美少女戰士啦…」原來Shiga的少女心從未減弱，而Shiga眼中的鄭融比較像一個姐姐：「佢行街好少會好大反應，但係佢每次行街都一定會睇鞋。作為一個女藝人其實都需要有一兩對比較靚嘅鞋傍身，但我初初入行就無乜呢個概念，啲同事會同我講『不如你買返一兩對靚鞋啦，襯衫都要啦。阿融有好多靚嘅鞋，你不如參考吓佢啲款啦！』我便開始留意阿融的搭配。」鄭融在旁大笑：「我都唔知有件咁嘅事，但係我借唔到鞋比佢，因為我著35號。」
講返音樂會，她們表示最想由觀眾告知最想看到什麼，鄭融表示：「而家這個時代，歌手與觀眾歌迷是應該多點互動，我最希望可以真正與觀眾交流一下。」Shiga亦趁機大讚：「其實我自己本身好鐘意鄭融啲歌，我出道前第一首跟唱歌老師學的歌便是《終身學習》，無諗過真係會認識到佢，仲可以一齊合作開音樂會。感覺好似一個小妹妹終於可以同一個偶像一齊做嘢，認識佢之前會驚佢好惡，但原來真人係好sweet好好傾，完全無距離。所以喺呢個演唱會當中，我最希望大家可以增加了解，有咩環節都唔緊要，但係我哋兩個一齊為一件事去努力已經令我好期待。」鄭融亦補充：「其實兩位女生合作開音樂會是一件很神奇的事，就像我之前看Sammy、林憶蓮、張惠妹、蔡健雅和那英姐姐的演唱會，會感受到一種Girl Power在當中，希望我們也能將這種感染力帶給大家。」
二人皆希望女性觀眾入場能感覺到共鳴，因為她們的歌曲的確為不少女生帶來回憶及鼓勵。不過面向男性觀眾，她們一樣不會冷待，Shiga率先表示：「跳辣身舞也可以考慮。想以鄭融的快歌來帶出跳舞的部份，因為以前看鄭融的MV，例如《紅花會》，我會禁不著大叫『嘩！性感小野貓！』，如果有一Part可以健康性感一下也不錯。」鄭融笑說：「其實我好少睇返自己嘅MV，不過我哋識做架啦！」
說著說著，她們更表示要改編對方的歌曲，Shiga最想改編《紅花會》：「我真係好鍾意呢首歌同個MV，不論係服裝定係編曲，如果演唱會再加啲EDM元素就perfect。」而鄭融最想改編Shiga的《大了一歲》：「如果鍾意Shiga嘅歌，就一定係因為佢啲歌詞，那時候單是看到歌名已經很喜歡，尤其有段時間自己也對成長很抗拒，聽到也特別有感受，所以這首歌對我來說很特別。」