Soler隔三年再出廣東歌 細佬Dino:我哋無離開過樂壇

撰文:
最後更新日期:

樂隊Soler時隔三年再次推出廣東歌,令一眾香港歌迷亦大感興奮,除了看到二人的身影經常在電視上出現外,深信不少人也很想知道他們這幾年來在音樂上的發展,到底是變成了一個單純的興趣,還是在韜光養晦,等待適合的時機?

識聽Soler,其實一定要聽Live!

Soler成員Dino接受《香港01》訪問時表示:「其實我哋作為音樂創作人,一直都有寫吓嘢,未必係完整一首歌,比較似係有一舊舊idea放咗喺度。而我哋計劃中,就會由今年開始向2018年發展。因為做音樂只係我哋工作其中一部份,我哋一向嘅賣點都會係現場音樂,CD會比較似係我哋演出嘅推廣,所以我哋喺中國南部,例如廣東,都有好多歌迷支持我哋,鍾意我哋唱廣東話。之前我哋試過出國語碟、英文碟,反而好多歌迷會話『OK,我哋都支持你,不過我哋都係最支持你哋嘅廣東歌。』所以我哋嚟緊都會喺香港、澳門、廣州呢幾個地方做宣傳,其實好簡單,有人支持,我哋就會唱。」新歌的編曲已差不多完成,Dino透露:「音樂部份就搞掂晒,而家爭歌詞未寫好。我哋最近同填詞人都傾咗好多計,係關於我哋點睇香港、點睇呢個世界,睇吓佢會點樣將呢啲故事寫出嚟。」

Soler表示他們早幾年放了不少時間在內地演出,所以今年是時候回香港發展一下。

提起新歌以外的動向,Dino宣布喜訊:「嚟緊我哋九月會去意大利演唱,去到嗰度我哋就係唱比意大利人聽,一樣會唱廣東話、國語、英文同意大利文。我哋希望行自己一套嘅國際路線,唔係去到美國就唱英文,中國就唱中文。無論去到邊度,我哋唱乜,當地人就聽乜,都係唱比佢哋聽,不過呢個係需要時間去做好跨地嘅關係,所以我哋感覺上做音樂會比較慢。而且我亦放咗好多時間喺家庭上面,Julio都一路搞緊畫展嘅事情,所以我覺得我哋出到三首歌其實都好好。」

原來佢哋九月將會去到意大利演出,發展佢哋心目中嘅國際路線。

Soler在2005年出道,但由於合約問題,故此一段時間也較少在香港露面,同期不少歌手如方大同、謝安琪已成為樂壇班霸,他們又會否覺得自己走慢了?Dino回應指:「其實我哋喺香港少露面嘅時候,反而喺廣州做多咗嘢,我哋有五年係放咗好多心血喺嗰個地區,所以點解我話我哋喺中國南部會有唔少人支持。當然我哋亦都認為今年係適當嘅時間返香港發展,好似同一班老朋友分享我哋嘅音樂咁。」

而Soler在香港樂迷心目中最大的印象,應該也離不開咀香園的廣告歌,對此Dino開玩笑說:「好多人以為我哋係賣餅,我有時都會覺得好好笑。有啲人睇完個廣告以為首歌係我哋寫嘅,不過其實首歌係間公司本身就有,我哋只係改編。我覺得無咩所謂嘅,呢個係商業世界好難避免嘅嘢,我哋想推廣自己嘅音樂唔代表一定做得到。」

尤其經常為港台拍攝節目。Dino表示,在香港人心目中,他們可能更像一個教英文的主持。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。