【一首歌】陳慧琳《花花宇宙》K房必唱 「發揮你小宇宙」

撰文:黃浩晉
出版:更新:

「細世界 會變花花世界/Oeo Oe Oe Oe O」

嘩!一睇上面嗰句歌詞,咩都唔使講,跟住唱埋落去先啦!你冇理由唔識嘅,陳慧琳嘅《花花宇宙》喎!

《花花宇宙》一曲於2000年推出,相信唔少8、90後一定識、一定聽過,而且仲會係一大班人唱K必歌頭10位o添!

「更多更多渴求 會有更高報酬/更高更高享受 為甚麼不追求」
「每天有新星球 發揮你小宇宙/趁火勢加風頭 有勇氣請追求」

唱到副歌就緊係世界入唱位啦!而且首歌咁多「Oeo Oe Oe Oe O」位,就算覺得自己唱歌唔好聽,喺K房唔敢開聲嘅朋友都可以喺呢啲位合唱,咁就唔使成晚坐喺K房食雞翼啦!不過話說回來,Kelly依家專心做潮媽,照顧「蝦餃仔」同「小籠包」,唔知幾時先可以喺香港聽到Kelly演唱會呢?

雖然Kelly早幾日喺facebook貼相話錄新歌,不過就未知首歌叫咩名,淨係知佢話好高難度。其實真係等咗好耐,好期待Kelly新歌同開Live!

唔講咁多,依家即刻約班friend去K房唱《花花宇宙》先!