【冷知識】歌手申請22次紅館開騷全失敗 唱片高層爆:批核冇準則

撰文:
最後更新日期:

個個歌手都想開紅館騷,但奈何要成功入紙紅館開騷「並唔係咁容易㗎葉師傅」,就連業內人士都唔知紅館方面由咩小組投票決定批期,亦唔知小組成員由何人組成。

黃凱芹早前於微博表示自己入紙紅館22次不果,「暴龍哥」鄭中基亦試過入紙7次才能在紅館開騷「還飛債」,當時亦講過唔知紅館批期有咩準則;就連前輩家燕姐想開紅館騷都要叫後輩楊千嬅、側田讓路,還有其他例子多不勝數。另外,據聞就連港、台都有名氣的杜德偉曾以個人名義入紙亦失敗,後尾要搵唱片公司出手才可成事。

每位歌手都話要「爭期」,到底點先可以「成功爭取」?當中又有咩準則呢?
《香港01》訪問了幾位唱片公司高層,結論是:「冇準則㗎喎!亦都唔知邊個係決呢件事!」

據聞杜德偉曾以個人名義入紙失敗,及後要搵唱片公司出手方可成事。

紅館(香港體育館)屬政府康樂及文化事務署轄下的室內多用途表演場館,而訂租表格亦可以康文署香港體育館網頁下載,又有訂租指引供參考,所以用公司或團體名義入紙申請「其實唔難」,不過紅館批唔批期俾你就另一件事。

其實紅館網頁有申請表供大家下載,不過入完紙批唔批又另一件事。

「準則」誰來定?

歌手們經常提到「唔知紅館有咩準則」,據知紅館方面有一個小組投票來決批出檔期事宜,但唱片公司高層卻透露:「冇準則㗎喎!從來都冇肯定話俾邊個嘅,亦都唔知邊個係決呢件事,又冇人出過嚟話我係呢個小組嘅話事人。」該小組如此神秘,難道是「圍威喂」投票產生?

雖然鄭中基年初終於成功開騷,但都經歷過多次入紙不果,佢都話唔知批期有咩準則。

紅館的商業考慮?
除咗冇人知負責投票嘅小組如何組成,唱片公司高層更透露其實紅館批期都有商業考慮。

「因為係盤生意嚟㗎嘛!佢(紅館方面)都會知道邊啲人開演唱會係得,有邊啲人唔得,佢唔可以蝕㗎嘛,你有權可以蝕到開唔成㗎喎!」

另外,個人名義是無法入紙申請,必須以公司或團體名體申請,但並非普通人開間公司就可以申請到,紅館都要睇該公司往績決定,唱片公司高層透露:「大公司就一定着數,好似東亞、英皇等等,睇record㗎嘛,會睇你以往有冇啲騷爛尾,又會睇如果你手上多artist,大部份銷售都ok嘅,咁攞個期咪容易啲囉,永遠都係咁㗎咋。」

如若兩位大星同時爭期,紅館會批俾邊個?唱片公司高層回應:「從來都冇肯定話俾邊個嘅,可能佢哋係一個輪流嘅方式,可能張學友兩年開過,劉德華4年冇開過,咁咪可能俾劉德華,係冇準則嘅。」

有大公司知情以及有名氣,攞期就易好多?

大公司之間密斟傾掂佢?

頭先提到紅館要睇往績,咁係咪代表名氣較低嘅歌手永遠同紅館無緣?唱片公司高層指公司之間會傾掂佢:「有時你又要compromise(妥協),如果本身係一啲唔係好紅嘅artist,又要自己搭台又要整嘢搞唔掂,咁你用人個台又得㗎喎,咁就改少少嘢用番人哋個台。但要同第二間公司去deal,例如劉德華本身攞咗12月檔期,但係開唔成,咁咪俾楊千嬅、側田佢哋開,公司之間傾咪俾幾場你做咁囉,呢啲嘢好死㗎啫,來來去去咪又係嗰幾間公司。」

講到尾,唱片公司高層都忍唔住話:「因為佢(紅館方面)唔憂做,基本上佢一年365日都爆硬嘅,大把人入紙,爭在佢揀邊個之嘛!」

業內人士透露,有時人氣不高的artist想開紅館騷要妥協。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。