【我不怕唱歌】前TVB愛將重返樂壇超有特色 麥美恩:放學ICU!

撰文:彭嘉彬
出版:更新:

麥美恩:我細細個聽佢唱《放學ICU》!
Bob:佢呢排肥咗啲!幸福呀!
余香凝:佢把聲係獨特嘅!
呢位朋友仔,外形又易認,把聲又獨特,更加係唔少人心目中嘅童年回憶,你又認唔認得出佢係邊個?
攝影:龔嘉盛 彭嘉彬
剪接:許柏倫
Make up : Yen Lai
Hair : Vince Pang@ilcoplo

香港樂壇曾經歷過百家爭鳴的時代,年尾頒獎禮競爭之大,令到不少好歌曲即使幾經傳頌亦未能得獎。縱使部份歌手未能成為得獎王,但亦有不少經典作品成為大家回憶的一部份。今次《我不怕唱歌》的嘉賓由兒童節目出身,熱愛演藝事業的他,曾在電視中陪伴不少人成長,後來更進軍樂壇,他對你來說又會否有著特殊的意義?

呢位哥哥仔嘅背影好熟面口,喺街上面見到你又認唔認得佢? (龔嘉盛攝)

近年醉心幕後,為女友推出多張發燒專輯,結果大獲好評。但他坦言並未放棄幕前機會,早年更因拍攝TVB劇集《使徒行者》讓大家重新喚起對他的回憶,亦試過組成樂隊打入《CASH流行曲創作大賽》。雖然事業未盡人意,不過他亦正式宣布將回歸樂壇,在今集《我不怕唱歌》當中,他選唱了兩首自己相當喜歡的《交叉點》及《幸運是我》,訴說自己多年的際遇。這位遇上不少高低跌宕的男歌手,便是鄧健泓。

久未露面唱歌的鄧健泓,今次特意選擇了兩首心水歌曲為大家獻唱。(龔嘉盛攝)
+2

樂迷對鄧健泓最大印象應該也離不開《心寒》、《朋友二號》、《直上》等歌曲,但今次在《我不怕唱歌》的環節中他亦堅持不唱這些歌曲,原來是來自他的陰影,Patrick坦言:「其實最初我無諗過會做《我不怕唱歌》呢個環節,因為做歌手難免會俾人評論,而我而家盡量想避免做啲事情出嚟俾人評論,因為我行出嚟都已經會俾人評論,可能我受過嘅傷害比較多。尤其我覺得自己唱歌其實真係唔叻,衰啲講,我把聲音唯一嘅好處應該係會有人認得出。不過當你哋(HK01) 好尊重我,搵我上嚟唱歌,我覺得都要尊重返你哋。」

雖然熱愛唱歌,不過歌唱事業似乎亦令鄧健泓受過不少傷害。 (龔嘉盛攝)

問起Patrick為何會選唱《交叉點》及《幸運是我》,他表示:「《交叉點》其實喺我5、6年前有一個機會唱,我再去細味當中嘅歌詞,先發現裡面嘅歌詞係要到某一個年紀去聽返,先會有感覺,尤其經歷咗一啲事情,個衝擊會更大。而《幸運是我》就啱啱相反,我覺得今日嘅我其實係好幸運,我幸運嘅係搵到而家身邊另一半,亦幸運自己仍然有能力為樂壇出小小力,我好開心自己嘅作品可以有一位好漂亮嘅歌手演繹出嚟。所以我經常會Keep住呢兩隻歌係心入面。」在Patrick口中的「經歷」及「際遇」,原來真的讓他改變了不少:「我嘅事業道路其實都有高有低,經過唔少波折,以前我嘅自信同棱角都非常強勁,亦因為咁而經常鑽牛角尖。但而家人大咗,我睇返自己原來好多嘢都可以做好啲。我希望自己而家可以做一個好嘅人,自然就可以成為好嘅演員同歌手。」

Patrick認為《交叉點》一曲,最能訴說他過往際遇中的感受。 (龔嘉盛攝)

提起過往的執著,連Patrick回想起也禁不著表示自己奇怪:「例如我以前出Show一定要著黑色衫,嗰時會覺得好有型,但呢啲執著而家大個睇返其實好古怪。反而我而家嘅著眼點係,當我知道我自己嘅堅持係啱,我就會希望大家聽我講,我唔係麻煩,每次我嘅執著都有原因。打個比喻,試過Sukie S開Show,個導演想音樂起嘅時候,Sukie S就喺鋼琴後面個幕行出嚟就即刻唱歌,而當時佢著住好長嘅裙。但我覺得一個歌手應該企定定喺個台上面,深呼吸然後先開始唱歌,呢啲就係我嘅執著。」

Patrick表示自己經常會跟別人持不同意見,其實只源自雙方為事情著想的執著。

近年專注為女友出碟,不少樂迷可能也會問,鄧健泓是否不會再出歌?他解話:「其實今年會再出歌,而家已經做緊後期,但我已經冇以前咁熱切。因為當我遇到Sukie S,我覺得佢唱得好好,好完美。令我開始愛上一啲完美嘅嘢,睇落去好靚,聽落去好舒服。再睇返自己,原來有好多不足,開始會對自己好多懷疑,而家我學識隨遇而安,唔好強求太多。以前嘅我會好享受喺台上唱歌,啲粉絲會一齊唱,一齊拍手;K房三甲都係我嘅歌,就已經好滿足好開心。但而家嘅滿足感係嚟自我寫咗隻歌,有人會唱。甚至幫到我另一半由冇乜人留意嘅歌手,變成而家有人覺得佢唱得好,賣到碟,呢種滿足感已經等同我以前做歌手嗰種成功感。」

成熟咗嘅Patrick表示,而家嘅成功感唔再止於自身,而係同女朋友一齊享受做音樂嘅過程。 (龔嘉盛攝)