一講周國賢，大家可能自動會諗起「周國腎」、「腎仔」、「港版Kurt Cobain」等等嘅花名；甚至會咎病以往佢唱Live，笑佢係「Studio Voice」。話雖如此，但周國賢沉寂一段時間後，近年唱Live穩陣咗好多，假音「冇咁假」，真音上高音又夠實淨，值得大家留意下，唔好再笑人以前啲黑歷史喇。
除此之外，周國賢嘅創作才華真係不容置疑，初出道的《目黑》、《地下街》、《不敵》、《14天》，到近年的《有時》、《陽光燦爛的日子》、《初戀殘酷物語》、《覺醒字幕組》等等作品都非常高質。而且周國賢以往予人攞住電結他Rock友嘅形象，但近年轉行彈木結他為主，以最純粹嘅「一人一結他」方式演出，帶俾樂迷另一個感覺。
日前港隊對印度的亞洲盃外圍賽賽事，入場人數達42570人，打破本地紀錄。在補時階段，港隊靠12碼入波，最終以1：0擊敗印度，球員賽後繞場一周感謝球迷支持，而球迷則隨著場館播放的歌曲大合唱逾5分鐘，這首歌是周國賢在2004年為動畫《踢出我天地》所唱的《黃金入球》！
《黃》歌詞熱血，是90後集體回憶，之前周國賢開演唱會，歌迷都定必點唱；而其實港隊主場賽事開始前，足總都會在社交平台公布歌單名單，《黃金入球》多次出現在不同賽事的歌單上。周國賢轉發了球迷大合唱的畫面，表示：「好狂 打咗大冷震 希望下一次可以置身其中。」
有球迷貼出自己與周國賢的對話，希望推到足總見到，周國賢向球迷表示：「你估我唔想咩？！如果大會邀請我，我一定會去唱，唱10次都得🥹快啲集氣啦😇」想不到足總的小編火速回應：「咁我哋下次就唔播歌，等佢唱啦喎🤤」在香港對印度賽事中，許靖韻、VIVA及「足球女將」MVP郭思都有唱歌助興，如果下次由周國賢擔任開場或中場表演嘉賓，球迷定必High爆！
