李克勤尾場孖校長開黃腔 送仙人掌寓意「一柱擎天」

撰文:
最後更新日期:

《李克勤慶祝成立30週年演唱會》一連9場紅館騷今晚尾場,為與克勤同賀入行30週年,不少樂迷早早已進場誓要逼爆紅館。甫出場,克勤已以一首《舊歡如夢》勾起大家回憶,雖然早前克勤表示舞台未如預期,不過睇返今晚表現,一個入行30年的歌手又點會Hea大家,一曲過後便吊上威吔,又空中自轉廿個圈,又爆煙花,已經向大家證明呢個Show絕對抵睇!

做完一場大龍鳳,掌聲未落,克勤已緊接要見真章,一連串medley耳熟能詳,《紅日》、《深深深》、《一生不變》、《舊歡如夢》,你想扮後生話無聽過都難。不過旋律雖然熟悉,原來medley歌詞已重新編寫,將克勤入行30年嘅經歷娓娓道來。由入行到加入TVB,結婚到生小朋友,連講波都喺歌詞當中提及,相當生鬼。

空中自轉廿個圈兼爆煙花,難度分我畀十分! (張浩維攝)

成首Medley又唱又跳,邊個話克勤唔識跳舞? (張浩維攝)

緊湊的表演項目過後,克勤向大家致謝,更大讚:「我真係好鐘意今次嘅演唱會Poster,一望落去就知係有啲年資嘅歌手,好似譚詠麟咁。不過唔好睇Poster寫30週年就以為我好老喎,其實只係代表個歌手好早入行。就好似Celine咁,佢如果入行三十週年喺紅館開演唱會,都只係三十九歲咋嘛。」一個靚抽,隨即引來全場大笑,他續道:「不過無論如何,我今晚都會用三十歲嘅活力為大家表演。」

克勤之所以有「CD勤」之稱,也要歸功於不少經典靚歌,演唱會氣氛一轉,克勤便唱出《藍月亮》、《當找到你》、《告別校園時》、《一生不變》等金曲,更拿出結他與樂隊邊彈邊唱。

Acoustic部分完結,讓演唱會轉向更型格的感覺,一眾Dancers手執煙火令場內變得煙霧瀰漫,更顯神秘。眨眼間,克勤已從十幾米高台升起,唱出《活著為求什麼》、《天水圍城》、《二十四城記》及新歌《失魂記》,配合LED幕牆,戲劇感十足。

克勤不忘搞笑本色,自認後生之餘仲順便抽Celine水,話大家一樣早入行。 (張浩維攝)

全世界都知道CD勤唱得,但原來彈結他都有一手。 (張浩維攝)

克勤開騒,好友又點能夠唔撐場?他表示:「有一個人,係我生命中嘅貴人,有個盆栽同有首歌我要送比佢。」隨即唱出《沒有你,贏了世界又如何》,校長譚詠麟在升降台出現,克勤立馬送上盆栽:「呢盆仙人掌送比你嘅,我本來諗住送玫瑰比你,不過諗諗下仙人掌好似啱啲,一柱擎天呀!」校長更笑說:「你講清楚喎,呢盆嘢分叉㗎喎!」黃腔一開,全場更是興奮,二人乘著掌聲雷動之際唱出《也曾相識》。

克勤同校長老友鬼鬼,校長仲話特登要就個靚位比傳媒影低佢哋世紀攬攬一刻。 (張浩維攝)

克勤同校長開黃腔,引得全場大笑。(張浩維攝)

克勤所站嘅高台已經高㗎啦,望真啲原來件袍長得仲浮誇。 (張浩維攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。