泫雅越做越出位 連《Roll Deep》MV都有19禁無刪減版
撰文：彭嘉彬
出版：更新：
經連日嚟同大家重溫泫雅嘅Solo作品，都應該Feel到泫雅不論係音樂作品同個人風格上都越趨性感，不過要令網民繼續留意兼且幫佢改稱號，又點會咁快到達下限？所以去到泫雅第四張個人專輯《A+》嘅時候又有新突破，主打歌《Roll Deep》搵咗男團BTOB嘅成員鎰勳一齊合作，當年MV一推出就已經喺24小時內突破一百萬點擊率，更加打入Billboard World Albums第二位同World Digital Songs第三位。
不過作風大膽嘅泫雅點會令大家失望，自從《Red》嘅MV被SBS MTV台評為「19歲以上觀眾才可觀看」，推出《Roll Deep》嘅時候，泫雅喺2015年9月頭索性推出多一個19禁無刪減版MV，等大家唔洗睇得咁吊癮。雖然話就話係19禁，千祈唔好以為有咩兒童不宜嘅情節，其實無刪減版都只係同普通版爭咗幾個近鏡，夾埋都唔知有無十秒，兩個MV唔拍埋一齊睇都未必睇得出有分別。
戴返個頭盔，下面呢個先係19禁版MV，慎入~