【獨自音樂】劉威煌拒入訓練班 做足5年陪襯:好似為許廷鏗而做

撰文:史順宜
出版:更新:

「01音樂」全新節目《獨自音樂》今集找來「威煌隊長」劉威煌。歌手劉威煌至今入行7年。當初他已TVB歌唱選秀節目《超級巨聲》而入行。他當初參加該個比賽便順理成章簽入TVB。更曾與許廷鏗、林師傑及陳鴻碩組成「Super 4」。雖然入行至今7年,完約TVB後加盟「棋人香港」追逐歌手夢。可惜出道已7年的他至今仍未推出個人唱片。在今集的《獨自音樂》劉威煌為大家演繹兩首歌曲:分別是《不離不棄》(TVB電視劇《情越雙白線》主題曲)及劉威煌的全新派台作品《灰狗》
攝影:黎家浩

今集的《獨自音樂》在荃灣拍攝,因為荃灣是一個充滿劉威煌「腳毛」的地方:「我由細到大都住荃灣區。住咗幾十年,我覺得荃灣雖然每一年都變,但有一樣嘢係唔會變就係荃灣區嘅人。呢一區雖然係舊,但有好多難以形容嘅人情味。荃灣區有好多小店,有好多我兒時已經留腳毛嘅機舖。除咗機舖,荃灣真係一個可以自給自足嘅地方。有好多好好食嘅老字號餐廳,又有波樓(桌球室)仲有唱K嘅地方。其實荃灣真係好好。」

劉威煌入行7年,曾唱出多首電視劇歌曲。(攝影:黎家浩)

不經不覺入行已經七年的劉威煌,可能觀眾會記得他的名字,畢竟他因《超級巨聲》成為TVB藝人,曝光的機會自然相對提高,以歌手來說,起步自然快人一步,但結果並未如大家所想:「我喺2010年加入電視台(TVB),回想咁多年,我劉威煌真係好似無做過啲咩嘢。我相信好多人會覺得劉威煌入咗電視台,自然條路一定會行得好好。但我覺得如果以演員為夢想的確係一個唔錯嘅開始,但我偏偏就一個歌手嘅身分入電視台。我覺得好難以歌手身分喺電視台生存。原因可能係唱嘅多數都會電視劇集歌,而且有好多嘅競爭對手,要做好多自己未必想做嘅嘢,所以大家唔好以為入TVB一定好開心。」

 

劉威煌曾認為組成Super 4後發展會更好,可惜被公司安排做許廷鏗的佈景版。(攝影:黎家浩)

劉威煌:好多嘢都為許廷鏗而做

「其實初初入TVB當時公司好似好好,當年我、許廷鏗、林師傑仲有陳鴻碩組成『Super 4』。開頭我會諗,會唔會將我哋四個人變做一個main focus呢?但後來發覺好似又唔係。因為當時許廷鏗除咗有電視台經理人合約仲簽咗一間唱片公司(星煥唱片)。而我哋三個只有電視台經理人合約。變咗中間有好多嘢都感覺好似為咗許廷鏗而做。而且我哋四個人唱嘅歌,主要都係電視劇嘅歌曲,亦都無無一個好好嘅方向畀我哋呢四個人。結果『Super 4』大家都知啦,後尾都不了了之啦。其實自己都覺得有啲可惜。」劉威煌說。

作為歌手的劉威煌為前公司安排他去參加藝員訓練班感到無奈。(攝影:黎家浩)

「我唔明既然唔幫我出歌點解當初簽我」

有很多藝人加入TVB都是為了一個機會,無論是歌手、演員或早是主持,只要能曝光都是一個機會,不過劉威煌似乎對此有自己的執著:「其實入電視台咁多年有一件事令我好唔開心。我係以歌手身份入去,我當然想唱多啲歌。無論係唱電視劇主題曲我都會開心。不過因為中段無咩嘢做嘅時候公司就提議一個方案,要我參加藝員訓練班。我覺得呢個提議好好笑,我係嚟唱歌,點解要我重新開始走去做演員呢?所以最終我拒絕咗,但係呢件事到依家我都係耿耿於懷。而當時真係有其他人接受咗呢個方案而嘗試得到更多嘅機會去拍電視劇。而我劉威煌就係因為我放棄呢個機會而開始慢慢工作量越來越少,甚至去到後期係無工作。我唔係想講一啲說話傷害呢間公司。只不過我嘅專長係唱歌而唔係做戲,我講嘅都係事實亦都無加鹽加醋。因為佢哋唔係一間唱片公司,亦都因為咁我先選擇離開去簽另一間唱片公司,只不過我唔明既然唔幫我出歌點解當初簽我。」

劉威煌為了唱歌而入TVB,卻為了出唱片而離開。(攝影:黎家浩)

劉威煌當初為了做自己喜歡的音樂而選擇離開TVB,簽約另一唱片公司「棋人香港」,可是由2015年簽約至今仍然未有這張「樂壇卡片」:「由2010年到今年2017年都已經七年時間。有很多人會問我幾時推出碟?以前我會答,出single(單曲)都唔錯,依家都唔多人出碟。但老實講我諗每一個歌手心入面都想出一張個人大碟。其實中間有發生好多事令我到依家未出到碟。包括自己成績問題,包括公司(棋人香港)budget問題,包括人事問題等。就係因為呢啲因素加加埋埋,其實到今日為止我都可以答大家,我仲未有機會推出一張個人大碟。呢個可能真係我發嘅其中一場夢。」劉威煌苦笑道。

劉威煌以《灰狗》唱出入行多年的心聲。(攝影:黎家浩)
《灰狗》主唱:劉威煌/結他伴奏:葉肇中(音樂監製)

38歲劉威煌最近以一首新歌表達他入行七年的心聲。歌曲以粗口諧音為名《灰狗》。由梁柏堅填詞,葉肇中作曲、編曲及監製。眼看他過去多年為「生活」而追夢,結果原來是為「生存」而遷就。

「入行七年我我一直以為自己係『生活』,但後來我發覺自己係『生存』。由我踏入呢行(做歌手)到做小生意都係為咗『生存』,為咗有飯開。而一路就墮入呢個深淵。以前嘅我(在工作上)有太多太多嘅遷就,太多太多的被動。我好希望可以做有一日做自己,我希望有一日我可以『生活』。」劉威煌由衷的說。

+6