李彩華唱惡搞歌《你唔拜我啦》 力撐二創：香港需要創作新力軍
早前在農曆7月盂蘭節期間，網上掀起一陣李彩華熱潮。全因為來自「高登音樂台」的網民，把歌手李彩華（Rain）的經典歌曲《你唔愛我啦》二次創作為《你唔拜我喇》。結果歌曲推出不久便在網絡瘋傳。更有不少網民留言希望李彩華能夠翻唱這首惡搞金曲。誰不知最近「高登音樂台」發布了最新的《你唔拜我喇》MV，而且更得到李彩華的加持，與網絡歌手「月巴西與你」認真合唱，令《你唔拜我喇》ＭＶ版再度網上瘋傳。
高登仔改《你唔拜我喇》為先人發聲 網民要推到李彩華翻唱：http://bit.ly/2xdNYJF
《你唔拜我喇》唱：李彩華、月巴西與你@HKGOLDEN／填詞：a仔、四眼雞丁、長_叔叔@HKGOLDEN／混音：漏奶@HKGOLDEN／拍攝：四眼雞丁、漏奶、眼超超、a仔 @HKGOLDEN／剪接：四眼雞丁、漏奶@HKGOLDEN （來源：高登音樂台）
身在內地工作的李彩華（Rain）接受《香港01》訪問時，談到網民把她的《你唔愛我啦》惡搞，Rain除了感到驚喜，更鼓勵網民應發揮創意：「當初《你唔拜我喇》一出嘅時候就已經有朋友send俾我睇，我當時喺內地拍緊戲，幾經辛苦打開嚟睇。睇完覺得好搞笑。無諗過喺盂蘭節《你唔愛我啦》會有個《你唔拜我喇》嘅版本。唔知重陽節、聖誕節、新年又會唔會有多啲版本呢？我本身就好支持大家發揮創意，所以我覺得網民多啲二次創作係一件好事。香港就係需要多啲創作新力軍，不論係正經或者係搞笑嘅創作，呢啲都係大家需要嘅。其實我一直都有留意佢哋（網民）二次創作其他歌手嘅歌，佢哋會將一啲社會問題或者現象用歌詞活生生去表達，我覺得咁做幾好。」
今次Rain與《你唔拜我喇》原唱人月巴西與你@HKGOLDEN合唱此歌曲，令不少人感到非常驚喜。談到今次的合作是否為順應民意，她表示：「《你唔拜我喇》呢首歌出咗無耐，我經理人公司就收到佢哋（高登音樂台）E-mail，邀請我同佢哋合作。其實時間好緊張，因為我當時喺內地返嚟香港兩日就要再飛返去做嘢。所以就要喺返嚟嗰兩日嘅其中一日拍完《你唔拜我喇》MV，點知好快手拍完。所以我覺得香港人真係好叻，相比其他地方香港人做嘢真係好快手好有效率。」
她續說：「第一次係網上聽到《你唔拜我喇》嗰位女聲（月巴西與你），覺得佢聲線好憂愁，點知出到嚟見到佢個人好可愛好健談，完全估唔到係佢唱。」
Rain在內地發展多年，在香港樂壇甚少出現。今年卻推出個人寫真並將在10月於旺角麥花臣舉行《十月的雨演唱會》。問到Rain是否希望回香港發展，她表示：「其實今年能夠返香港發展，真係一個機緣巧合。我咁多年一直喺內地工作，咁啱我有一個多年老友介紹Angelababy個攝影師俾我，我打算搵佢影一輯靚相，後來講講吓變成出寫真集。之後又有人又搵我問我有無興趣開騷，我緊係覺得好啦。自己係歌手身份入行，但係一個音樂會、演唱會都未開過，所以就一拍即合，完成我呢個多年心願。」
李彩華最近積極籌備演唱會，更強調唱功會比以前有所進步：「相隔咁多年再唱歌，我到時一定會俾大家睇到我歌藝嘅進步。今個演唱會我會唱一啲我以前嘅歌，又會翻唱人哋嘅作品。今次開騷我好希望唔會有悶場，所以選歌方面都會好小心。」（曾經與古天樂、蘇永康、方力申出歌，會不會請他們做嘉賓？）「我知道佢哋都係好忙，如果佢哋得閒緊係好啦，不過真係要睇吓有邊位老友得閒。」
提到《你唔拜我喇》在網上瘋傳，Rain指視乎氣氛而定：「Rundown（流程）暫時都未定，唱唔唱《你唔拜我喇》就要睇現場氣氛，氣氛好嘅可能都會玩吓。我盡量希望唔好畀自己太大壓力，想當日好似當開party咁。」