農夫演唱會有子華神做嘉賓？ C君：好難講俾你知喎
撰文：黃梓恒
出版：更新：
仲有一個月就開騷喇。（Facebook圖片）
農夫事隔多年終於再開演唱會，熱烈程度實在始料不及，一開頭怕反應唔好，揀喺旺角麥花臣呢個細場開，點知啲飛賣到斷晒市，已經確定會加開兩場。見到反應咁好當然好開心喇，所以農夫都一定會努力回報粉絲，除咗會落力演出之外，可能仲有特別驚喜添喎。事關今日他們就在網上post了一張同DoDo姐加埋黃子華嘅合照，以佢哋同DoDo姐嘅關係，要請到佢撐場絕對唔難，不過可以請埋子華神，就真係好驚喜喇！
估唔到子華神都請到出嚟。（Facebook圖片）
雖然擺晒合照咁，不過又未必真係會做嘉賓，《香港01》就立即找來C君問一問，他說：「好難講俾你知喎，叫到佢嚟睇已經好榮幸，總之兩位非常幫手啦！」賣晒關子咁喎，但就算子華神唔係做嘉賓，可能只係睇吓綵排俾吓意見，一定令農夫兩個獲益良多喇。
佢兩個都好落力宣傳。（Facebook圖片）
農夫跟DoDo姐自從《Do姐有問題》之後，就一直都合作無間，他們的節目被觀眾認為抵死搞笑得嚟又輕鬆，完全唔做作，所以間接亦令農夫得到唔少粉絲。而子華神跟DoDo姐在《男親女愛》合作完後一直都是好好的朋友，加上農夫不只一次提及子華神是自己的偶像，可能今次出盡人情牌，請DoDo姐邀請子華神來俾吓意見。雖然未肯定會唔會做嘉賓，不過如果真係有呢個機會，相信唔好話係麥花臣開 6場，可能紅館開6場都爆呀！
農夫同Do姐嘅節目真係好好笑。（電視畫面）