農夫闊別舞台7年再開騷　毫無冷場感謝樂迷：多謝你哋供養我哋唱K

香港Hip Hop組合農夫今晚於旺角麥花臣場館舉行《農夫等錢洗演唱會》，農夫對上一次開騷已是7年前的事，很多樂迷已「餓騷」很久。陸永與C君拍住DJ Tommy一出場立刻炒熱全場氣氛，所有樂迷都舉高隻手企晒起身，歡呼聲此起彼落。
攝影：梁碧玲

陸永與C君一出場就話：「歡迎嚟到麥花臣，你睇下呢度幾多人，如果你po文記得po上IG、Facebook同連登，俾人睇到農夫上鏡靚仔過真人！」然後一段快歌medley包括多首大作：《風山水起》、《音樂大亨》、《學海無涯》、《日出而作》等等，全場樂迷都舉高手跟住唱跟住跳，無需熱身已經一遍瘋狂。

整個演唱會絕無冷場，除了除了陸永C君落力Rap，又有DJ Tommy打碟Solo，RX獻技beatbox一把嘴同時做出5種聲效，更邀請到Heyo、JYD、Double T等rapper出場freestyle，一同高呼：「香港一直都有嘻哈！無論地上定地下！Respect！」除了rapper又有dancer出場break dance battle，而且農夫兩人搞怪跳「熱血舞」，滿足晒樂迷三個願望。

驚喜一浪接一浪，農夫二人大放笑彈：「係咪冇揸流灘先！演唱會部份完咗㗎喇！你哋頭先又跳又嗌都唔知係你做騷定我做騷，跟住就到我哋relax唱K傾心事。」

農夫又話：「不過同平時唱K有啲唔同，我哋有咪你咪冇；平時有得點歌，今晚冇；今次傾心事，得我講冇你哋講。不過有一樣嘢相同嘅，就係你哋係要夾錢㗎，多謝你哋夾錢供養我哋唱K！」雖然要「夾錢」，不過樂迷一樣受落俾足反應，歡呼聲連連。