【獨自音樂】最愛代表作《矛盾一生》 JW:令我信心由負數變正數

撰文:
最後更新日期:

要數近年在香港成功的歌手,我深信JW王灝兒一定是其中一位。90後的她自初出道時已被認同其歌唱實力。到近年她更唱出多首共鳴情歌,成為網絡大熱,令她終於能在明年一嘗紅館美夢。JW熱愛唱歌程度要用非一般的熱愛來形容。JW在拍攝節目當日帶病在身,製作團隊亦擔心當日她的聲音狀態,不過敬業的她仍堅持唱出《矛盾一生》及《你帶著我們的青春離去》,希望所有收看節目的觀眾能夠感受JW對歌唱的熱誠。

攝影:謝浩然

雖然帶病在身,但JW仍堅持唱出《矛盾一生》及《你帶著我們的青春離去》。(攝:謝浩然)

90後的JW王灝兒年紀輕輕已在不少歌唱比賽中得到優異成績。自初出道首推其第一首作品《掛念好友》時已被肯定其唱功。其後更有不少人因合唱歌曲《男人信什麼》而把JW的聲線與當時的師姐衛蘭Janice相提並論。近年轉簽新公司(Sunny Idea)後,她的事業更上一層樓,唱出多首網絡大熱之作:《矛盾一生》、《小故事》、《多少年》及早前與坤哥(吳業坤)合唱的《原來只因深愛著》等,當中《矛盾一生》在Youtuber更錄得8位數點撃次數。苦等七年,她終於有登上紅館的機會。

談到作品《矛盾一生》,坦白說歌曲的威力不只在網上的點撃次數,其故事所產生的共鳴感,更常常成為網絡熱話。有人認為《矛盾一生》成為JW事業轉捩點,也有人認為《矛盾一生》為JW帶來紅館演唱會的機會:「唔只係一首歌咁簡單,我入咗新公司之後,改變咗好多,因為整個團隊都好用心幫我。不過我好多謝所有為《矛盾一生》而付出嘅人,包括作曲嘅林家謙、填詞嘅陳詠謙、編曲嘅黃兆銘仲有編曲加監製嘅周錫漢。因為呢首歌令我得到好多,佢令人認識邊個係JW,帶俾我喺歌唱事業嘅信心。呢首歌可能對好多人嚟講係一首情歌,但對我嚟講係一首成就我夢想嘅作品。所以 It’s not one song,it’s everything!」JW說。

「我覺得做歌手從來都唔係付出100%就會有相等嘅回報。歌手除咗要有實力,亦需要靠運氣,際遇。我覺得自己好好彩,入行7年遇過好多幫我嘅人,佢哋都好錫我,好支持我自己,所以我一直都好感激所有喺呢7年幫過我嘅人。」JW說。

JW於2010年成為歌手,同年有C All Star,Supper Moment、林奕匡、吳若希、連詩雅等歌手出道。單以同年出道的女歌手來比較,JW的確比她們快得到紅館舞台的機會,但JW卻認為一切是因為際遇及運氣問題:「雖然我唔係年年都順利,但相比起其他我認識嘅歌手朋友,我面對嘅挑戰比佢哋少。有時我會諗,佢哋其實好有實力,好唱得,但佢哋未有機會或者際遇未如理想。呢一行好多嘢都唔係必然,既然我自己有咁好嘅際遇我一定要好好珍惜。」

JW續說:「緣份好重要。其實所有同我同期出道嘅歌手都好有才華,我自己都好欣賞佢哋。我相信不久嘅將來大家都會有同樣嘅成績。只不過我好彩,所以我先有呢個機會。我到現時為止都係覺得,開紅館演唱會,根本就係上天跌落嚟嘅禮物,呢份禮物唔係只係送俾我,而係全公司上下。有呢個機會喺眼前我會好好珍惜,我好想可以用呢個機會做一場好好嘅演出。唔會諗賺唔賺錢,其實開一場真係唔會點賺到錢。今次我同公司一心為音樂而做,真係好想做到一個好靚嘅performance畀大家睇。」

JW的新歌《你帶著我們的青春離去》以姊妹之情為題材。(攝:謝浩然)

JW表示自己性格樂天,全因她是一個雙子座性格的女仔。(攝:謝浩然)

JW雖然唱過多首誠意之作,但她曾經也在事業上經歷迷惘期:「啱啱轉新公司嘅時間係我最迷惘嘅時間。我覺得自己做嘅嘢同Expect嘅嘢好唔同。我未轉公司嘅時候因為仲係邊讀書邊唱歌,成日飛返香港錄音,當時真係覺得時間過得好充實。但到讀完書之後全職做歌手,之後轉新公司,因為未有歌嘅關係,job比較少。而當時自己家姐係做律師,我同佢嘅收入完全比下去,所以我成日俾自己好大嘅壓力。雖然曾經有過迷惘嘅時間,不過其實我每一年都算係開心嘅,因為身邊總會有人支持我,我係一個好樂觀嘅人,我唔鍾意鑽牛角尖,我係一個雙子座性格嘅女仔。無論有咩困難我都會look to the bright side!」

JW唱過多首代表作,究竟那一首才是她的最愛?

「可能會有好多人會覺得我最鍾意嘅歌一定係《矛盾一生》,Which is true!我自己都好鍾意《矛盾一生》因為佢令到更多人再次認識JW。呢首歌帶畀我好大好大嘅自信心。令到我由信心係負數變為正數。呢首歌對好多人嚟講係一首情歌,但對我嚟講係一首成就我夢想嘅作品。無呢首歌,我未必有機會上紅館。不過除咗呢首歌,我都好鍾意好《多少年》、《Stupid BOII》仲有新歌《你帶著我的青春離去》。其實我一直都好想做一啲Hip Hop、Rap曲風嘅歌,而《Stupid BOII》呢首歌終於俾我等到。至於《你帶著我的青春離去》係一首R&B嘅歌曲,其實我一直都好鍾意R&B嘅歌曲,而且我又好欣賞Cousin Fung(作曲人)嘅作品,今次可以同佢合作我真係好開心。」JW笑言。

JW認同香港做快歌比慢歌蝕底。(攝:謝浩然)

JW在剛剛推出的大碟《My Tale》在網上反應熱烈,但相比當中的快歌《Stupid Boii》成績未如其他抒情歌曲。一直希望多做快歌的JW也為此感到頭痛:「其實我自己一直都好鍾意快歌,但唔知點解喺香港做快歌永遠都唔係好work。做一首快歌嘅製作費真係好貴,又要請dancer,又要排舞,每一次表演又係要請dancer,仲未計拍快歌MV需要嘅製作又會特別多,呢啲全部都係錢。當你用咗咁多錢同心機去做一首快歌但係反應未如理想其實係幾discouraging,公司自然都會覺得做快歌唔抵。不過我唔會放棄,嚟緊我會為演唱會造一首快歌嘅theme song,不過仲搵緊demo,希望到時大家會鍾意。」

+8
+8
+8


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。