【叱吒樂壇】我最喜愛歌手入圍名單 衛蘭JW胡鴻鈞殺入五強
踏入12月，幾個樂壇頒獎禮都即將舉行，今日商業電台公布叱吒樂壇頒獎典禮，三個我最喜愛的歌手最後五強，十五組名單中有好多熟悉嘅面孔，好似陳奕迅、張敬軒、楊千嬅、容祖兒等，但更值得期待嘅應該係一班新血，呢兩年走勢凌厲嘅JW，仲有憑住《降魔的》熱潮人氣暴升嘅胡鴻鈞，都係首次打入我最喜愛最後五強，令戰況倍添變數。
1996年開始設立嘅我最喜愛歌手獎項，從設立起都係以一人一票形式選出得獎歌手，可謂人氣指標。今年香港樂壇可算頗多變化，早已上位嘅張敬軒容祖兒都無推出新歌，幾乎半讓賽，換來更多有實力但一直欠機會再上嘅歌手，有發圍空間。過去一星期剛完成第一階段投票，三個我最喜愛歌手獎項分別從8組入圍者選出5強，結果出爐名單令人感到驚喜。
首次入選五強嘅JW，取代去年得主鄭欣宜成功佔一席位。由去年嘅《矛盾一生》起JW已經成功穩佔一線女歌手之位，嚟緊一月初更會踏上紅館處女開騷。JW得知自己入選叱吒五強都表演激動：「我入咗五強呀！！！真係好多謝大家嘅支持！！！多謝所有投票俾我嘅朋友！！！多謝903！！過去呢幾日真係好似坐過山車咁，可以同方皓玟、容祖兒、楊千嬅、衛蘭一齊入到五強真係覺得好榮幸！！ 我係第一次入到我最喜愛女歌手五強呀！！！入到五強真係已經當贏咗⋯⋯！！」
衛蘭今年狀態大勇，打入五強實屬意料中事，但佢都感到非常興奮，事關對上一次入圍已經相隔超過十年：「This is crazy ! The last time I was in top 5 was in 2005 . So excited ! Thank you so much for all your votes !!! #thankyouGod」睇番紀錄衛蘭對上一次入圍應該係2006年，睇嚟佢真係興奮得滯記錯年份啦。
男歌手方面戰況就更為激烈，憑住劇集熱潮人氣急升嘅胡鴻鈞，擊敗許廷鏗、周柏豪、周國賢，首次打入五強，將會同連奪兩年男歌手獎嘅同門吳業坤拗手瓜。好兄弟人氣咁旺盛，坤哥都唔敢坐以待斃，第一階段投票最後兩日，坤哥足足出咗6個POSTS叫大家去投票，仲改圖自嘲又動之以情，好在最後成功打入5強。其實今年坤哥同JW合唱嘅《原來只因深愛著》，唱到街之巷聞，MV點擊率突破400萬，絕對有機會成為我最喜愛男歌手三連霸。
我最喜愛的男歌手五強：吳業坤、胡鴻鈞、陳柏宇、陳奕迅、張敬軒
我最喜愛的女歌手五強：JW王灝兒、方皓玟、容祖兒、楊千嬅、衛蘭
我最喜愛的組合五強：C AllStar、Dear Jane、Supper Moment、ToNick、Twins