【十大中文金曲】李克勤曾經歷最慘頒獎禮:試過入去坐嘅機會都無

撰文:
最後更新日期:

一年一度的樂壇頒獎禮又來了。今年香港電台打破往年慣例,先由他們頒發樂第一張樂壇成績表。今日(12月17日)下午舉行的「第四十屆十大中文金曲」中總共頒發30個獎座。至於另外5個獎項將會在1月4日的音樂會頒發。在今次的頒獎禮中,入行30周年的李克勤獨得3個獎項(十大中文金曲、優秀流行歌手大獎及銷量歌手大獎),成為今天的大贏家。

李克勤獲3獎,成為暫時大贏家。(陳順禎攝)

李克勤接受《香港01》訪問時坦言,今年特意預留時間出席頒獎禮,「對於我嚟講今年出席嘅頒獎禮全部都係同『承諾』兩個字有關。因為今年年頭,我同祖兒(容祖兒)喺內地做巡迴演唱會嘅關係,TVB專程派人拎獎頒俾我哋。而過往兩年香港電台都有頒獎俾我,但我都同樣因為工作關係而缺席,但佢哋都有頒。例如係之前派台嘅《一個都不能少》,或者係之前校長(譚詠麟)寫俾我嘅《你最重要》,港台都有頒獎俾我。所以我喺年頭嘅時候,我承諾年尾一定會出席頒獎禮。而且,可以親身上台攞獎始終都係一件開心嘅事。」

克勤憶述試過比頒獎禮「食白果」更慘的經歷。(攝:陳順禎)

今次克勤先獲3獎,成為暫時的大贏家。克勤憶述他試過比頒獎禮「食白果」更慘的經歷,「過往30年出席過好多唔同嘅頒獎典禮,成績最豐收或者係最慘烈嘅我都試過。最豐收嘅就係得到『最受歡迎男歌手』、『金曲金獎』、『最優秀男歌手』呢啲獎。至於最慘烈嘅唔係頒獎禮『食白果』,而係人哋唔記得叫我去出席。記得有一年我喺屋企睇某頒獎典禮,我就問同事『今年我去頒獎禮坐下都好呀』,點知原來人哋無邀請我。我當時連想入去坐嘅機會都無,我覺得呢個經歷係慘過『食白果』。」

克勤認為JW是一位有潛質的後起之秀。(陳順禎攝)

近年樂壇青黃不接現象再成討論話題,克勤對此情況司空見慣:「其實香港樂壇無話青黃不接。每一個年代都會有新人,需要畀時間一班新人。我自己都做過新人,我都面對過呢啲問題。正如好多年前已經有人問譚校長『青黃不接』呢個問題。其實呢個問題每一年都有人問,亦都會有人答。我覺得依家有好多有實力嘅新人,好似今日攞『十優』(優秀流行歌手大獎)嘅時候,企喺我旁邊嘅JW(王灝兒)第一次攞呢個獎。JW係一個唱歌唱得好好而且好有潛質嘅女歌手。除咗JW,我今日第一次見到樂隊ToNick,佢哋今年有一首好hit嘅歌叫《長相廝守》。呢啲全部都係樂壇嘅新力軍,我覺得樂壇唔只係得一啲大家熟口熟面嘅歌手,係應該多啲唔同嘅人,我希望大家共勉之,一齊為香港樂壇努力。」

ToNick憑歌曲《長相廝守》獲頒「十大中文金曲獎」。(陳順禎攝)

+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。