【勁歌總選】最好聽唔係得獎歌手　蔣志光胡鴻鈞《遙不可及》超OP

《2017年度勁歌金曲頒獎典禮》做咗成晚，似綜藝多過似頒獎禮，深信大家都無乜認真聽得獎歌手攞咗啲咩獎，又唱咗啲咩歌。皆因一廠冷氣大，唔少歌手表現都強差人意。不過全晚除了有CD勤之稱的李克勤為觀眾帶來超穩定演出外，想不到還有一個驚喜。皆因胡鴻鈞在奪得「最佳演繹男歌星」後，一口氣唱出《朋友身分》及《遙不可及》兩首歌。而唱出《遙不可及》時，蔣志光老師突然在舞台上出現，並與胡鴻鈞合唱，超水準的演出，令網民感嘆蔣老師的唱功比起不少得獎歌手高幾班。

其實之所以胡鴻鈞的「最佳演繹男歌星」會由蔣志光頒發，並且合唱的原因，也離不開早前二人在網上發佈自家製影片，合唱《遙不可及》，更得到網民一致讚好。胡鴻鈞早前接受《香港01》訪問，表示：「有一次宣傳活動上面，蔣老師問可唔可以攞《遙不可及》嘅MMO（伴唱聲帶），我當時好開心證明佢真係有聽同埋鍾意呢首歌，所以我就問可唔可以同佢合唱拍條片放上網。」結果促成了今次舞台上的合作。似乎今年胡鴻鈞的確有運行，除了在《降魔的》中得到石敢當這個好角色外，歌曲也泊到蔣志光老師這個好碼頭，反應咁好，不如下年真係出隻合唱歌啦！