周國賢帶頭打擊黃牛黨 超有心售票方式贏讚
撰文：彭嘉彬
出版：更新：
周國賢上月中在麥花臣舉行《銀河鉄道之夜》演唱會，開得三場，「餓騷」已久嘅樂迷又點會夠喉？所以上月頭，官方經已公佈將會加開兩場，喺1月20、21號舉行《麥花臣節 X 周國賢GALACTICA銀河鉄道之夜2018》，唔少樂迷亦深感興奮，一開售便在5分鐘內爆滿。最令人感動嘅係，知道演唱會一票難求，周爸爸帶頭以全新方式售票，務求令黃牛退散，讓歌迷得到真正的購票機會。
上個月喺麥花臣開騷，唔少樂迷已經呻買唔到飛。 (江智騫攝)
為阻黃牛購票，上月頭周爸爸已在facebook上公布新的購票形式。 (網絡擷圖)
上月頭「腎仔」已在社交平台上宣布，今次《麥花臣節 X 周國賢GALACTICA銀河鉄道之夜2018》是以Google Form的形式購票，即意味只有Google Account才能登入購票訂單，而每個Google Account只能提交購票表格一次，每次限購四張。無得排隊買實體票，黃牛黨都無辦法霸佔大部份票源。可能你會挑戰該做法：「唓！我一個人開N咁多個Google Account咪得囉，仲唔洗排隊𠻹！」為防範這個情況出現，周國賢背後為演唱會籌備的工作人員「銀行鉄道行動組」更非常有心，每張訂單也需通過whatsapp及電郵核實，若有重覆訂單及電話號碼出現，便會立刻被取消購票資格。
雖然以上的措施未必能完全杜絕黃牛黨，但也足以將大部份黃牛排除。其實這樣的購票方式背後需要的人力物力遠超我們想像，所以不少網民也大讚今次做法：「終於有歌手做呢樣嘢！」、「辛苦晒銀河鉄道行動組，見你哋有時覆電郵都凌晨時分，感激你哋今次嘅安排同付出！」、「你(周國賢)係第一個帶頭做呢樣野嘅人，希望今次可以帶動埋其他歌手正視一下炒飛問題，打擊黃牛！」
唔少網民大讚周爸爸同銀河鉄道行動組，今次先贏黃牛黨一回合！ (網絡擷圖)