【有片】謝霆鋒彈結他騷單線Solo　Chef Le Mon原來識彈古箏

謝霆鋒正式宣告2018年會全面回歸樂壇，早幾日更耗資過百萬人民幣，於北京架起大型會場舉行記者會，仲透露已經錄好幾首作品，嚟緊可能去外國唔同地方錄音：「就係為特地去錄結他聲呀、弦樂呀等等。」絕對係不惜功本。元旦日喺叱咤舞台表演，重現單線Solo神技。原來霆鋒除咗彈結他出神入化，仲識彈古箏添！最近就有網友翻出霆鋒1人彈3部古箏嘅片段，果然不同凡響呀！

今年叱咤舞台上，謝霆鋒聯同Supper Moment以及觸執毛互jam《活着VIVA》令人津津樂道，Supper Moment亦喺慶功宴為「單線Solo」平反：「唔好再話單線Solo易彈，你要彈得準係超級難！」原來霆鋒唔只結他掂，仲識得彈古箏添！

有網友搵番去年10月霆鋒上載到微博嘅短片，片中見到著住墨綠色廚師制服嘅霆鋒，坐喺古箏前面專心彈奏，雙手不停撥弄古箏弦，雖然就無彈結他咁出神入化，不過都聽得出佢唔係亂彈架噃！最正嘅就要數到第45秒開始，明顯一個剪接位之後，霆鋒企咗起身紥馬企好，雙手分別放喺兩部古箏上彈奏，節奏又完全接得上架噃，果然厲害！中西樂器都舞得掂，真係愈來愈期待霆鋒開騷有咩特別表演。