【專訪】黃思迦初入行時心靈脆弱：聽到「呢個係邊個嚟？」就想喊
撰文：史順宜
出版：更新：
歌手黃思迦自2015年以藝名「池希」成為歌手後一直發展平平，到2017年她終於再遇到伯樂並加盟耀榮文化，最近更推出她的全新單曲《Soulmate》，為她停滯不前的歌唱事業展開新一頁。
攝影：黃國立
歌手黃思迦（原名：黃寶瑜）於2015年被吳若希的第一位經理人發掘，由舞蹈員簽約成為歌手。當時她以「池希」作為藝名，合作期間曾先後推出了2首單曲及1首合唱作品，可惜一直出碟無期。 「我當時以師姐吳若希為榜樣，佢真係一位唔會放棄好勤力嘅歌手。佢令我相信只要勤力及堅持終會有出頭嘅一日。」思迦說。
歌手黃思迦（原名：黃寶瑜）於2015年被吳若希的第一位經理人發掘，由舞蹈員簽約成為歌手。（攝：黃國立）
師姐吳若希得到不少人賞識，令到師妹的她不禁憧憬自己有被認同的一天，可惜最終還是被投閒置散：「未轉公司之前錄咗幾首歌，但係都冇咩機會出。」她續說：「因為工作量唔多，我曾經試過戶口得三百幾蚊，當時要過日子都幾麻煩，又唔想家人擔心，所以要出去搵工，最後我回到之前做dancer嘅地方教跳舞維持自己生計。」
提到成為歌手是否與她預想不同，她表示：「以前會覺得成為歌手係一件好開心嘅事，但出咗歌之後出面冇反應，個心真係會唔舒服。我覺得自己初入行時心靈好脆弱，我喺台上聽到有人講『呢個人係邊個嚟』我就想喊。不過依家嘅我大個女，我已經比以前堅強。」
+2
思迦在2017年前路終有所改變，她簽入耀榮文化，今年更推出新歌《Soulmate》。這首歌曲不但選用她喜愛的曲風，歌曲更呈現了她的想法。相比以前事事言聽計從主見不多的她，無疑給大家重新認識的機會：「今次新歌喺台灣花蓮取景，由識於微時嘅Otto（前Eo2成員）幫我做創作總監，火火填詞。我對呢首歌都好有共鳴，人生有好多過客，但一生人想尋覓一位Soulmate（靈魂伴侶）其實好難。要搵個靚仔，佢又未必可以一世都靚仔，要搵個風趣嘅，笑得多自然會有悶嘅一日，但要搵一位可以體諒自己，令我暢所欲言嘅Soulmate反而唔容易。」
髮型：Karl @Beijing Hair Culture CWB
服裝：Market Libety
場地：Honbo