音樂圈打滾多年有話兒 卡式帶樂團:點解追糧仲好似自己唔啱

撰文:
最後更新日期:

卡式帶樂團Cassette對你或許有點陌生,但當中兩位成員卻是熟悉的面孔,Aeolus是樂隊Peri M的主音,Jonny是樂隊Closer的Bass手。雖然兩人同樣Rock友出身,但Cassette擦出的火花並非只單純得搖滾,而是想像空間較大的電子音樂。既然「少林功夫都可以加唱歌跳舞」,電子加搖滾又有何不可?

攝影:梁碧玲

Cassette組成的契機追溯到幾年前,Jonny離開原有樂隊後仍有一堆作品在手,當時還未想到要將作品賣掉或是留來自用。恰巧邀請到Aeolus幫忙唱Demo,大家都發覺電子音樂是一條「新血路」,所以一拍即合。

卡式帶樂團Cassette成員:Johnny與Aeolus。(梁碧玲攝)

Rock友轉玩電子似BB學行路

電子音樂的元素與搖滾樂與別不同,雖說未至於180度相反,但也算是跳出自己的comfort zone,感覺像是初生嬰兒學行路。Aeolus說:「錄音嗰陣,監製要我掉開以往嘅唱腔,真係好辛苦,因為係自己唔想觸及嘅範圍。」Johnny亦表示,創作時「攞聲」花最多心思:「音樂上自己腦入面都已經有份譜,但淨係揀一個切合到首歌嘅鼓聲都好用時間,要一路不斷試。」他們希望可以像東京事變的Bass手龜田誠治一樣,找到屬於自己、最能代表自己的聲音。

Johnny表示由Rock轉玩電子最大難度是編曲上如何攞聲。(梁碧玲攝)

玩電子嘢有辣有唔辣
心水清的讀者都會留意到,平時Cassette演出,Aeolus負責歌唱部份,Johnny彈Bass,背後豐富的編曲全靠事前編好的Programme。但Programme歸Programme不似真人一樣會「就吓你」,這正是難度所在,Johnny說:「出騷時聽Click要醒十二分精神,唯有逼自己練得再準啲,因為少少偏差都好覺。」不過Aeolus卻表示二人陣容更靈活:「其實做商演方便咗,因為容易控制聲浪;如果一隊Band做商場騷,一響鼓就已經會俾人投訴。」

雖然每次演出事情功夫較多,但Aeolus表示兩人樂隊靈活性較大。(梁碧玲攝)

點解追糧仲好似自己唔啱咁?

音樂人與其他自由工作者一樣,收入不穩定的主要原因莫過於被人拖糧,Aeolus與Johnny於音樂圈打滾多年,同樣也面過對這苦況。Johnny直言:「呢啲人唔守信用真係幾討厭,我唔明佢哋覺得做音樂係可以拖糧!當我諗住三個月後會收得番條數,可以夠生活,點知突然冇嗰下真係好徬徨。」他續說:「就連大公司都有呢個心態,我唔信佢哋冇錢囉;付出咗咁多心機時間,唔信我哋真係咁分文不值!」

「點解追糧仲要好似自己唔啱咁?」(梁碧玲攝)

除此以外,同行「做爛市」亦令他們感到非常頭痛,Aeolus說:「有時追糧仲好似自己唔啱咁;另外,做爛市本身已經係唔尊重自己,呢個係專業呢㗎嘛!你付出咗心機時間,但對方會覺得,唱歌只需要擘大個口,結他彈幾下就得。但其實嗰舊錢係值㗎,係需要俾㗎;如果你乜都求其搵人做,咁咪出事囉!」

「橫又死掂又死,不如去盡佢啦!」(梁碧玲攝)

橫又死掂又死,不如去盡啲啦!

雖然在香港玩音樂要面對的困難,有時比一般人多,但要找出路別無他法,只有堅持,Johnny笑言:「橫又死掂又死,不如去盡啲啦!」正因為這份動力,令他們除了營運樂隊以外,還得到不少幕身後工作的機會,例如Aeolus曾為盧巧音、何超儀、許靖韻等人擔任演唱會和音; Johnny亦有為不同音樂單位填詞。Aeolus說:「經過咁多年,要話俾自己聽,既然選擇咗玩音樂,就要努力搵方法令自己做得好啲之餘,令收入穩定啲,令屋企人放心。」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。