林俊傑紅館演唱會今賣票 暗黑絕望座位表3場加埋6000張公開發售
撰文：洪曉璇
出版：更新：
林俊傑近年每次開騷都掀起撲飛熱潮。（林俊傑IG）
+9
到底依家香港有咩唔使搶購？貴至幾百萬嘅樓，車位甚至月餅，都要排隊排到天昏地暗，演唱會近年更加係黃牛黨橫行。林俊傑嚟緊9月再度喺紅館開個唱，大批歌迷及排隊黨早喺十日前已經瞓街輪候，點知6號就發生兩名口罩男持牛肉刀斬傷歌迷事件，情況令人擔憂。8號早上正式公開發售，面對暗黑座位表，購票網成朝入唔到，令FANS們真的憤怒了﹗
主辦單位售票通告指「公開發售首日每人每次限購票4張，共3場約6000門票於城市電腦售票網公開發售」。6000張好似好多？望埋張座位表再講，呢次JJ紅館個唱開3面台，每場少於一萬張票，現時康文署容許轄下紅磡香港體育館舉辦表演項目的主辦單位，扣起最多8成門票作「內部銷售」，今次JJ三場有6000張每場2000公開發售，又係漆黑一片都係意料中事。
今朝好多人撳極都未入到購票網，見到呢個畫面已經叫贏咗。（網上圖片）
有網友留言話：「絕對是侮辱了「公開發售」4個字！！！！我只看見「施捨給你的座位表」！！！！」，「我逐格數都計唔到有2000個位﹗」，「仲要過埋南亞排隊黨果關，排得前過佢就比佢劈，排得後過佢票尾都無……」信用卡優先預訂每張卡可以訂6張演唱會飛，公開發售就只得每人每次4張，忠實歌迷不禁嘆一句：「如果無信用卡，唔識內部人士，又無時間去排隊，即係逼我地買黃牛架啫。」
每場大約可以有一萬名觀眾，到底要加幾多場先唔再有黃牛？（林俊傑IG）