ToNick新歌《你好》再放催淚彈:從來造音樂首要係滿足自己

撰文:
最後更新日期:

樂隊ToNick為電影《女皇撞到正》創作主題曲《你好》,為切合歌曲「晚空中思念對方」的主題,日前一行四人夜晚到鯉魚門沙灘拍攝MV,他們更「劇透」,MV中有一件小道具與電影互相呼應,希望觀眾留意這項小心思。

攝影:葉志明

《女皇撞到正》由導演甄栢榮執導,繼《救殭清道夫》後再次與ToNick合作,而主音恆仔更會在戲中演出一角。上年ToNick憑《長廂廝守》爆紅,於頒獎禮獲得佳績,今次新作《你好》同樣為電影主題曲,會否有壓力「要做多一首《長廂廝守》」?恆仔直言說:「我覺得呢個唔係壓力,其實係冇可能,我哋只能夠每次都盡力去創作。」結他手小龜亦補充:「觀眾喜唔喜愛就睇緣份,《長廂廝守》其實一個好好緣份,希望《你好》都有呢個緣份。」

為拍攝新歌《你好》MV,ToNick特登入夜去到鯉魚門沙灘。(葉志明攝)

小龜亦分享《你好》的創作過程,他表示歌曲中情感表達與《長廂廝守》截然不同:「《長廂廝守》一種歇斯底里,無點樣都要同你一齊;而《你好》就係,只要你好就夠喇,無論係可以咪擁有到,呢種情感不單止係情侶,可以親人或者朋友。」

他又提到本身四人苦無頭緒創作《你好》,經甄導邀請看試片後,四人馬上靈感到,他謂:「有時創作就係唔一定要好長,只要有件事touch到你就可以好快做到。希望觀眾聽完首歌,睇完套戲都有呢份感動就好喇!」

對住個靚海景,唔知《你好》MV入面有咩彩蛋呢?(葉志明攝)

「從來造音樂作品,第一樣要滿足係自己!」(葉志明攝)

除此以外,樂隊風格改變往往會引起樂迷討論,去年《長廂廝守》的出現,有人會認ToNick不再如以往一樣貼地,歌詞失去鬼馬抵死的感覺。今次《你好》的誕生會否怕有同類聲音出現?

小龜則認為,他們創作的首要目標是先滿足自己:「從來造音樂作品,第一樣要滿足係自己;我覺得所有做藝術嘅行業都係咁,你要有呢個感覺先延續到份熱情。今次題材係自己深入同自己溝通而出發,壓力在於,可唔可以好好地,思考咗咁耐嘅題材發揮好。」鼓手晨曦亦補充:「我哋寫歌題材來自生活,依家我哋更加認真喺生活發掘題材,冇怠慢造歌過程。」

早前網上一段棟篤笑影片成為熱話,因為片中對樂隊文化的誤解與取笑,引來喜歡樂隊文化的網民批評,ToNick對這影片又有何反應?Bass手Ryan說:「我好想請佢嚟睇Band Show,可能佢對Band文化唔理解,話唔定請佢睇完Show佢都會鍾意。」小龜亦表示只要事主多了解樂隊文化,自然不會再以此題目開玩笑:「我覺得網上再公審佢就唔好喇,我諗佢都係誤解,如果請佢睇多啲Band Show,佢了解咗唔係咁佢想像中咁樣,佢自自然然就唔會諗到呢個題材講。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。