【書展2019】別讓鋼琴成為孩子的監牢 張崇德出書講音樂教育

撰文:彭嘉彬
出版:更新:

張崇基張崇德,在香港樂壇中可說是特別的存在。有別於一般主流歌手,「基會難德」是可說是香港少有的男子二重唱品牌。而弟弟張崇德博士(Peter)多年來一直也致力於音樂教育事業中,在這個3歲小孩已經要學懂彈琴的世代,Peter認為音樂教育要脫離傳統的模式。考級制已未必適合每一位學生,雖然終歸也是一句:「要令學生真正愛上音樂」,但知易行難,到底Peter如何在實行上取得成功?今年書展他推出新作《音樂教養—音樂培育孩子的8個美好》,與家長分享學習音樂的好處,其實音樂教育也是一門學問。
攝影:陳順禎
化妝:Fa Tsang @ Jennifer’s Workshop
場地提供:Maison Ant Nouveau Ltd.

張崇德今年書展推出新書《音樂教養—音樂培育孩子的8個美好》,分享學習音樂的好處及樂趣。 (陳順禎攝)
+1

曾見證男生考滿鋼琴8級:佢以後冇再掂部琴

香港著名填鴨式教育,在音樂上也不例外。要談音樂教養,首個問題必定是:「不管三七廿一,家長們也要子女在3歲小童學會鋼琴,入小學時最好已經要懂兩種樂器,才稱得上基本。Peter對這種教育方式有什麼評價?」答案出乎意料,張崇德直道:「其實學鋼琴,的確係早開始比較好,我嘅書裡面都有解釋原因,不過呢個問題嘅癥結,其實係在於點教。」

提起這個話題,Peter坦言也曾經見過一個較可惜的個案:「有一個小朋友,一路都好聽話,父母要佢學琴,佢學;要佢練琴,佢練。父母對佢嘅期望係一定要考到八級,佢好聽話,直至到佢考到八級當日。」那位男生拿著八級證書回家跟父母說:「你要我做嘅嘢我做咗啦,呢八年嚟我好似坐監咁,我以後唔會再掂部琴。」這個案提醒了Peter,別將音樂變成孩子的監牢:「對小朋友嚟講,佢哋細個可能唔識表達,家長期望佢哋做乜就照做,成為一種慣性。到大個識得表達嘅時候,原來已經失去咗音樂。」

談起「音樂填鴨式教育」,Peter見證過有位男生考獲八級,最後卻變得討厭鋼琴,深信這情況也是家長不樂見。 (陳順禎攝)

家長應如何為子女選擇樂器?

自小與哥哥張祟基一起學習音樂,回想小時候接觸音樂,張崇德認為並非有壓力的事:「因為我哋細個鐘意唱歌,所以就去參加合唱團。13歲先開始學琴,當時係因為哥哥想學,阿媽覺得一個人學唔抵,所以就兩個一齊。」雖然學琴並非Peter本願,不過仍覺得音樂是一件開心事:「開始學古典,終於發覺原來學鋼琴或者學音樂,原來真係幾難,要用好多時間。同大家一樣,我都試過畀父母鬧點解唔練琴。」小時候的音樂路也是以興趣為主,直至大學時期副修聲樂才真正鑽研,開啟了音樂的新一頁,他憶述:「記得當時喺外國見到有個男仔,著皮褸騎電單車,望落去點都唔似音樂人。但原來佢係我上聲樂堂嘅琴手,鋼琴小提琴都演繹得好好。」該名男生突破了Peter對音樂人的傳統刻板印象,亦令他了解到,原來外國的小朋友從小已可以免費學習音樂,令他們有更大空間自由發揮。

現時香港不少家長在小朋友成長階段也會有一個苦惱,便是到底應該怎樣為子女選擇適合的樂器?就如Peter自身的經驗,育有一子一女,他們家庭從小開始便開著音樂作伴奏:「有一次同個仔玩,佢問我點解冇音樂聽,我就知道佢已經習慣咗有音樂嘅環境。再慢慢長大,佢哋會有自己聽歌嘅喜好,亦會搵到自己想學嘅樂器,做家長千祈唔好將自己嘅期望放喺佢哋身上。」同時Peter亦建議:「最好由細開始畀佢哋試多啲唔同類型嘅樂器,試一兩堂都好。而家坊間亦有機構畀低收入家庭嘅小朋友免費學樂器,又或者有啲嘉年華會,介紹唔同類型嘅樂器畀幼童認識,畀佢哋逐樣望下、摸下、試玩下,佢哋就會慢慢搵出自己嘅興趣。」

在加拿大留學副修聲樂,張崇德認為外國從小的音樂教育跟香港不同,亦營造出理想的教學氛圍。 (陳順禎攝)

辦學理念不依從古典方法:學生可以表現唔好,但一定要開心走

開辦音樂學校,Peter堅持一個信念:「學生可以表現得唔好,但一定要開心咁走。」若果你曾跟從傳統方法學音樂,表現不好時大概也會被老師責罵,甚至是「打手板」,Peter亦接觸過一些學生個案,因此害怕了學琴:「有一個五年級嘅小朋友,佢第一次嚟我學校嘅時候,個樣好愁、好攰。佢媽媽話佢以前明明學得好好,而家開始唔想學,朋友介紹下就嚟咗我學校睇下幫唔幫到佢。」當時Peter與學生了解一番後,估計這種反差是跟之前的老師有關:「後來我安排咗一位好溫柔好有耐性嘅老師畀佢,上咗一堂之後,佢媽媽已經話佢態度上有轉變,開心咗好多。其實我哋要明白,五年級嘅學生本來已經有功課上嘅壓力,如果我哋仲逼佢要快啲考級,呢個壓力會導致佢哋對音樂失去興趣。」問到那位學生後來怎樣,Peter表示他幾年後已經完成了八級,更打算向演奏級挑戰。

親自教聲樂的張崇德,不少學生也是社會人士,下班後上堂經已筋疲力盡,有時表現得不如人意,他們也會向Peter表示:「我驚你唔再教我,我唱到走晒音,你會唔會嫌我唱得差?」Peter笑言:「如果你唱得好就唔洗學啦,你係應該唱得唔好,所以我先要教你。你喺我面前係應該唱得未夠好,不過有一個要求,就係你出到去同朋友唱卡啦OK,你享唔享受唱歌?如果你享受,就自己會要求自己進步。」有時學生會對自己過於嚴謹,導致壓力亦因此產生,Peter認為,學生是否理解自己的能力以及進步速度也非常重要:「其實不論學生定成年人,佢哋喺音樂以外都有其他嘅事情處理,要返學返工,做功課加班。時間限制下,進步慢係非常合情理,明白咗呢樣嘢之後,自然唔會令自己有壓力。」

跟傳統方法不同,張崇德認為學音樂不需強逼:「只要佢開心走,佢就會有動力繼續學。」 (陳順禎攝)