何哲圖否認星夢喺《勁歌》獨大:有好多唔同唱片公司嘅歌手攞獎

撰文:
最後更新日期:

上月TVB宣布曾志偉回巢擔任副總經理兼行政委員會特別顧問,全面負責綜藝及資訊娛樂節目板塊。今天(5日)有傳媒報道,有傳曾志偉將招攬資深電視人何麗全回歸整頓《勁歌金曲》,改善近年總選由星夢幫壟斷的情況。星夢娛樂行政總裁何哲圖(Herman)接受《香港01》查詢時指:「我都係睇報道先知,唔知佢係咪真係會返嚟。關於《勁歌》上面嘅改革,我就交畀志偉同Sandy(余詠珊)再傾。」及後記者再問起有關《勁歌》公信力、與四大唱片公司關係、及友台ViuTV舉行樂壇頒獎禮等,Herman亦逐一回應。

今日有傳曾志偉將招何麗全回歸整頓《勁歌金曲》,「星夢幫」及後或不再獨大。(資料圖片)

傳曾志偉招何麗全回巢整頓《勁歌金曲》 星夢今後不再獨大?

近年《勁歌》總選的大獎幾乎都由星夢歌手獨攬,因而一直備受網民評擊,直斥公信力欠奉。Herman否認「星夢獨大」指控:「就算係依家,我都開放畀其他唱片公司參加,剛剛過去嘅總選係有好多唔同唱片公司嘅歌手攞獎,就算係獨立歌手,冇公司嘅,我哋都會畀鼓勵,因為當中都有好多出色嘅歌手。(除咗英皇,其他大唱片公司都冇獎?)咁莫文蔚都係Sony嘅,我都專誠請佢返嚟唱歌。(有特別招數邀請?)唔係,我都有出去同其他唱片公司嘅人打下交道嘅。」

何哲圖相信《勁歌》改革相關事宜,曾志偉將和余詠珊有緊密溝通,但不清楚何麗全是否回歸TVB。(資料圖片)

至於公信力問題,Herman認為獎項具公信力:「我哋有做啲民意調查,知道係好多人都認同呢首歌,我哋先會頒獎。我覺得啲獎喺民間嘅認受性大,我真心希望可以畀到鼓勵一啲歌手,而唔係埋沒咗佢哋過去一年嘅努力,你留意下睇網上平台,星夢嘅歌真係有好多人聽緊。(但係好多人都話冇公信力?)我諗每個人都對獎項嘅接受程度唔同,可能佢哋對其他頒獎禮嘅接受度多啲。」他解釋,過往的「勁歌金曲比賽合約」制度在數年前已經廢除,原則上一直歡迎所有唱片公司歌手競逐獎項:「我都有同其他公司傾,不過有啲公司話派歌手上嚟宣傳就OK,但係就唔想入榜、參選。」

何哲圖認為《勁歌》總選具公信力,不認為現今有「星夢獨大」跡象。(資料圖片)

被問到相關改革會否與友台ViuTV在年中舉行頒獎禮有關,Herman直指:「都唔關事嘅,每個台嘅候選準則都唔同,冇得咁樣比。例如我哋會睇(歌曲)喺新媒體嘅反應,亦都有投票機制,等我哋可以睇到街外人嘅選擇,知道佢哋鍾意邊啲歌、邊啲歌手。」

Herman坦言過去都有其他大唱片公司歌手得獎,例如莫文蔚正是Sony Music旗下歌手。(葉志明攝)



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。