【專訪】周殷廷唱主題曲網民熱捧 想繼續隱世:大家會更專注聽歌

撰文:
最後更新日期:

過往ViuTV的原創劇集,主題曲都會邀請鄭中基、周慧敏、鄧麗欣等名氣較高的歌手主唱,在坊間的討論度同樣地高。而較早前播出的劇集《太平紋身店》,主題曲《遲了悔改》就由出道已有5年的歌手周殷廷(Yan Ting)演唱,是他久違三年再推出的廣東歌作品。

新歌不但得到陳凱詠、Gin Lee(李幸倪)等圈內好友大讚,在網絡上亦好評如潮。其實Yan Ting出道至今亦推出過《小姐你好》、《愛與罪》等其他作品,可惜至今仍未有一首爆紅的代表作,談及歌曲在網絡反應熱烈,他指自己沒有後悔成為「隱世歌手」:「我反而覺得咁樣係對首歌、對成件事有更強嘅肯定,大家真係因為今次咁樣而覺得,佢哋會鍾意咗呢樣嘢,令我更加開心。所以我唔會後悔做咗『隱世歌手』,因為大家會更加專注咁聽歌,了解更多嘢。」

撰文:劉傳謙

Yan Ting認為,「隱世歌手」的身份更令樂迷專注欣賞歌曲,令自己覺得《遲了悔改》得到的肯定,絕大部份是因為作品水準令大家滿意。(《太平紋身店》劇照)

幕前空窗期不等於低潮期

幕前唱歌工作經歷3年空窗期,Yan Ting坦言自入行以來接觸過音樂以外的不同範疇,大學時修讀電影的他亦有意投身拍攝工作,既在不同故事中尋找更多合適的表達方法,亦增加不少創作上的靈感。他認為過去3年並非遇上事業低潮:「如果喺呢3年時間冇自我增值,我諗會令自己非常迷失、空虛,但係我喺呢3年入面不斷嘗試用唔同嘅方式尋找自己想講嘅故事同埋方式,反而不斷發現到新嘅自己,同埋自己唔認識嘅一面。」

因為過去3年自己一直增值自己,因此自己不認為這段時間有任何迷失、空虛。

要充分表達一首歌曲所說的故事,Yan Ting認為可以多參與歌曲、MV和文本創作,令整個信息更完整。他在出道前就為吳雨霏執導《今夜煙花燦爛》MV,及後亦為Super Girls(《有沒有我?》)、AGA(江海迦)擔任MV導演(《3AM》),又為Gin Lee(李幸倪)《幸福門》擔任監製,假若時間回到2015年初出道時,Yan Ting仍會選擇成為一位歌手:「如果我冇行到呢條路,都唔會嚟到呢一刻。呢個係任何一個創作者嘅必經階段,要去學習、揣摩你嘅門藝。例如講緊煮嘢食,有啲人會淨係做日本菜,有啲人會煮法國菜,但係有啲都會係試法國融合(Fusion)菜,唔同組合都會令件事更加獨特。又例如每個人都可以煮到唔同嘅日本菜,你可以專注做一樣,然後變化出好多唔同嘅嘢。我係比較似煮融合菜嘅,正因為係做歌手,先可以令我喺呢一刻學到唔同嘅嘢,發掘唔同方向嘅自己。」

執導Gin Lee《幸福門》MV 張蚊揭開選角原因:陳漢娜氣質夠詭秘

+4
+4
+4

不過,Yan Ting坦言這段時間亦有令自己後悔的事。他坦言過去未有在事業上取得平衡,令自己失去陪伴至親的時間:「因為工作都忙,有唔同嘅嘢想嘗試、創作,但係同一時間有唔同嘅嘢加埋一齊,令我冇咗時間陪伴身邊嘅人。呢啲時間係返唔到嚟,所以最後悔係搵唔到一個好好嘅平衡點。」

Yan Ting自認太忙,過去沒有時間陪伴家人。

新歌引起男生共鳴:攞咗自己最珍貴回憶

《遲了悔改》講述一對戀人各自朝著不同目標,因而產生磨擦,令一對戀人越走越遠。Yan Ting相信男生會更容易對歌曲有共鳴:「好多時我哋會用我哋嘅方式對待一段感情,用我哋嘅方式表現我哋嘅愛,但係呢啲事未必係一段感情入面需要嘅嘢,我哋都冇靜落嚟去聽,其實對方要嘅係咩。例如我哋以為要畀一種生活佢,或者著緊點對佢,但係對方係咪真係需要呢樣嘢呢?好多時我哋以好自私嘅諗法覺得呢件事係好,到最後其實唔係。」

Yan Ting相信新作更容易引起男生共鳴。

Yan Ting直言歌曲是自己的寫照,他聯想起一段中學時期的戀愛:「我哋都拍咗一段好長嘅時間,一直都好開心。但係佢有一日突然間同我講『我唔再愛你,我想像唔到點樣可以繼續一齊。』呢件事係毫無預兆,亦都毫無解釋,唔知係咩原因就完咗。」

談到新歌得到不少網民喜愛,他直言自己意想不到坊間反應正面:「我唔係諗呢首歌有幾受歡迎,而係諗緊呢首歌受唔受歡迎。因為我希望將最真實嘅嘢攞出嚟,之後如果大家欣賞、鍾意,我真係非常之感激。我覺得最緊要係攞咗自己最珍貴嘅回憶、故事同感受出嚟,咁就已經足夠。」

今年有機會聽到更多Yan Ting嘅作品!

談到日後發展大計,他指自己和公司已經籌備一段時間,並已經錄好新歌,並藉此回應網民訴求:「之前都有網民問我,其實都錄好晒歌,究竟幾時出?其實今年都會陸續出埋之前錄咗嘅歌,亦都喺唔同嘅曲風上面嘗試唔同嘅嘢。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。