MC張天賦一連五場的《張天賦 E=MC² 演唱會2026》今晚（7日）在紅館開鑼，他在牢籠中登場，在舞蹈員陪伴下，跳唱《Tipsy》、《This is MC》等快歌打頭陣，之後唱到自嘲身高的《168.5》，第一位嘉賓Billy Choi與他合唱，更被幾位踩高蹺的舞蹈員包圍著，相映成趣。

之後他感謝喜歡聽他歌曲、有介紹過別人聽他歌曲的朋友，坦言開Show前很緊張，因有太多太多不確定，但表示：「但唔知點解個台一升上嚟嘅時候，忽然覺得個感覺返嚟！個演出嘅感覺，令到我暫時唔記得咗緊張嘅感覺，所以接下落嚟要keep住灌輸能量俾我，有多啲力量就可以行多啲去唔同嘅地方，畢竟呢個四面台非常之大！」他又笑指本來不是這部份談話，但前一日綵排時發覺，跳完舞回唔切氣唱下一首歌。身穿白色西裝的他，又預告絕對不會除衫：「我係減咗肥，但係我未瘦到可以除衫。」

演唱會舞台效果和裝置非常豐富，他騎在紅鶴升上半空，演唱《老派約會之必要》，唱《小心碰頭》及《乖乖報到》又在高空滑梯滑下，而到《反對無效》、《Good Time》時，手執多個大紅氣球的舞蹈員，陪MC走匀全場，並為他與不同方位的觀眾拍照留念，而去到《世一》時，MC站在高台演唱，後段放花炮和紙碎，本來第一下MC都冇事，但可能未料到有第二下，他被突如其來的響聲嚇一嚇，露出「張三歲」可愛反應，更不禁失笑，但仍保持鎮定待唱完後才說：「哎呀！嚇死人喇～～」

緊接著有好友陳蕾跟他合唱《永久損毀》，今次亦是陳蕾首次做MC演唱會嘉賓，MC解釋為何會揀她做頭場嘉賓及唱這首歌，原因是此曲難度甚高，MC笑言：「趁我把聲仲係第一場，未爛嘅時候，即刻請你嚟合唱咗依首歌先！」MC透露初見陳蕾是自己簽約華納後，在一個打邊爐飯局上，他向對方說：「我仲特登行埋嚟講，我好鍾意你呀陳蕾！」而陳蕾坦言：「我嗰陣秒速心諗，新簽呢個人口花花！」更大爆他講錯歌名，懷疑MC是臨急臨忙上維基百科搜尋自己的名字，認為對方是輕浮、死𡃁仔、撩姐姐講嘢。

由於MC換衫需時，陳蕾收Order要講足5分鐘才好唱歌，她就分享對MC的進一步印象，指2021年認識MC，起初覺得他很佻皮，絕對認同他就是「張三歲」，但「但係無變嘅係，咁多年之後，我依然覺MC真係好單純、好透明、好直率，到依一刻我都覺得佢出道咗咁多年，佢呢幾樣無變嘅，而變咗嘅係佢越來越成熟。」陳蕾指近來越來越喜歡睇MC的訪問，其對答確實已變得成熟：「慢慢見到佢由一個男仔演變成一個輕熟男。」陳蕾回想二人2021年拍攝廣告後變得熟稔，亦因該廣告歌《凡星》而加深認識，對上一次對方開紅館演唱會，陳蕾在台下聽到MC唱《凡星》，還帶Busking朋友上台，彷彿演活了這首歌，她更是格外感動，並因此在今次演唱會選唱《凡星》。

睇更多MC演唱會靚相：