小肥與Serrini翻唱《青春頌》大讚對方唱功:我學緊嘅嘢佢掌握晒

撰文:
最後更新日期:

小肥(徐志勇)上年9月接受《香港01》訪問時透露,自己正與音樂人陳輝陽合作籌備翻唱專輯,後者將在其他歌手和音樂人的作品中,選擇10首2010-2020年間推出,能引起香港人共鳴的歌曲,並且將它們重新編曲。當中在2013年許廷鏗所唱的《青春頌》,就被陳輝陽挑選為10首作品之一,今日(3/5)凌晨小肥無預警將新歌放上音樂串流平台,新作更與Serrini合唱,令不少歌迷感到驚喜。

小肥與Serrini合唱Alfred的《青春頌》,是現正錄製的翻唱碟中的作品之一。(網上圖片)

小肥接受《香港01》訪問時透露,這次合作都是由陳輝陽一手撮合,早在上年7月邀請時,Serrini一口答應。他又說,自己當初沒有想過能與對方合唱:「佢都有問我講,但係一開始真係冇諗過佢會搵Serrini。當然我好早已經好欣賞佢,但係佢初初同我講《青春頌》想搵女歌手合唱,呢個情況會即刻諗起自己嘅朋友先,第一時間唔會諗住有新衝擊。之後佢突然間建議要搵Serrini,我當然係話好啦!」

小肥指這張翻唱專輯從選曲、編曲到用人,都由陳輝陽一手包辦。(資料圖片)

小肥上年在擔任港台《十大中文金曲》評審時,已經向樂迷推薦Serrini的作品。在錄音室聽過對方唱歌後,他亦大讚對方唱功了得:「其實錄緊呢張碟嘅時候,我學緊把聲點樣唱得通透啲,咬字冇咁塞住喉嚨嘅方法,而Serrini係完全掌握晒呢啲嘢。佢有話我唱得好勁,我就話『唔係啦,你勁啲!』」不過,小肥在錄音期間發現,要與Serrini合唱並不容易:「佢嘅聲底同聲量,會好容易將對方把聲完全蓋過,真係要好小心應付。之前聽咗幾次,覺得出到嚟Serrini把聲太細,既然搵得佢嚟,大家把聲應該要平起平坐。我建議過要較大返佢把聲,但係當較大咗嘅時候,原來係會蓋過咗自己把聲,我先知道同Serrini合唱原來有呢個隱憂。」

小肥認為與Serrini合唱並不容易。(資料圖片)

專輯內翻唱作品全部都經過陳輝陽重新編曲,小肥坦言其中一個困難是理解新編曲的方向,又以《青春頌》作為例子:「一開頭陳輝陽係唔會話畀你聽點解佢要咁編曲,當中又有乜嘢意思,我自己都會領略錯誤,佢就會糾正返我。例如呢首歌中間有一啲變奏,原來佢係專登整到有一種年輕人啱啱學夾band嘅狀態,我聽到之後都覺得好有趣。」

小肥指《青春頌》是在整個企劃中段錄製,因此在錄音期間,他不需要花太多時間摸索新唱法。(資料圖片)

作品一出,《青春頌》的原唱許廷鏗(Alfred)就留言說:「下次加埋我一齊唱!」小肥透露,當初拍攝MV時已經有意與對方合作:「我想佢喺MV某啲位置出嚟,畀一啲驚喜大家,不過佢嗰陣好似遇著一啲合約問題,佢覺得有啲困擾。不過我都見到佢IG嘅留言,當然係有機會(合唱)啦,呢單嘢佢肯就得啦。」他又透露自己將在10月底於旺角麥花臣場館舉行演唱會,屆時或會邀請對方合唱。

小肥本來想請Alfred現身MV,但當時對方卻因與舊東家華納處理合約問題而婉拒。(許廷鏗Instagram圖片)



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。