Chill Club演唱會|Serrini獲花姐批准拖姜濤手:要問過人先做得

撰文:劉傳謙
出版:更新:

ViuTV昨晚(5/6)在旺角麥花臣場館舉行《Chill Club A New Stage》音樂會,林家謙和Serrini擔任其中兩位表演歌手。令部份樂迷覺得可惜的是,當晚演出未能聽到二人合唱,不過Serrini笑指:「今晚淨係掛住同姜濤同埋Ian好開心咁合唱,完全唔記得咗有另一個男人存在,不過今日好滿足。」家謙也幾乎同一時間指:「係囉,我都淨係掛住同二汶、Gin Lee唱,唔記得咗呢位年度女歌手。」

家謙同Serrini睇落好似一對冤家,其實兩位私底下係好朋友。(葉志明攝)

今晚Serrini先後與兩位MIRROR人氣王合唱,期間更相繼與他們手拖手,她坦言事前已經得到經理人花姐批准:「原本我淨係好似一碌木咁企喺度,同埋淨係敢自己旋轉,但係花姐話『你可以同佢哋有啲交流,掂下佢哋,甚至走嘅時候可以好似一個姐姐咁,拖住細路一齊走。』(林家謙:你肯定係姐姐?)姨姨囉!」不過在合照時,Serrini就不敢有太多身體接觸:「你係我都唔夠膽啦,佢哋咁多Fans,我真係唔夠膽撓佢,要保持距離。(驚Fans嬲?)係呀,同埋要宣揚一個好重要嘅信息,就係所有嘢要問過人先可以做,如果對方覺得ok先去做。」

+3

家謙直言剛才在鋼琴前十分緊張,原來他演繹《一人之境》demo版《Another Day》時遇上一個災難性的技術問題:「唔知點解成個琴低咗半度,我一彈落去就覺得唔對路,個Key(音調)同隊Band完全唔同,呢個災難係可以好大,因為差半度其實好撞聲。Band喺一入歌嘅時候都知道有問題,但係真係冇辦法,冇可能彈咗之後無啦啦升返啱,所以佢哋都即刻轉咗Key一齊夾。之後第二首就要彈返啱,輪到我自己要轉返啱,個腦不停諗住要點彈,變咗歌詞已經唔記得七七八八。我真係未試過咁大災難,但係大家可能未必見得到,真係好恐怖。」

以往家謙喺鋼琴面前自彈自唱都非常穩陣,點知當日鋼琴出現災難性問題,影響家謙發揮。(葉志明攝)

點擊圖輯,重溫林家謙同Serrini表演:

+11