【勁歌金曲】陳展鵬攞埋男歌手咁威？ 胡定欣力撐：不需要懷疑
《勁歌金曲頒獎典禮》1月7日舉行，《勁歌金曲》是今年四大頒獎禮最後一張成績表，不過遊戲玩法早已改變，今年超過一半候選歌曲都是TVB自己友。《勁歌》常客胡鴻均有4首歌入圍，而捱足21年的視帝陳展鵬，亦有兩首電視劇歌曲入選名單，包括《巨輪2》主題曲《誰可改變》和《城寨英雄》合唱歌《從未知道你最好》，更加入選「最受歡迎男歌星」，可以話係叫緊糊！
男歌手獎的最大對手分別是張敬軒和李克勤，不過陳展鵬依靠大台，又有觀眾緣，勝算自然略高一籌！而兩首歌曲中，以《從未知道你最好》的呼聲最高，不少網民都認為，展鵬的人氣足以問鼎金曲金獎殊榮，今次都算眾望所歸，他不諱言恨攞獎：「我真係唔知會得什麼獎，但我明天會出席，我覺得呢首歌在好多媒體都得過獎，當然我不是歌手身份，但有呢個幸運和緣份拿到是很好的，其實這些獎項在我入行不久，一路都好恨，今年好似用一年時間滿足晒咁多年的願望！」
其實陳展鵬初出道時做過歌手，出過四首歌，可惜星運平平被迫轉做演員。今年唱歌有好成績，又會否像林峯轉戰歌壇呢，他說：「其實一路都有唱歌，但離開樂壇一段時間，放左好多時間做幕前，要唱歌真的需要過到自己，要一段時間沉殿一下，再感受一下音樂，同埋有咩鍾意嘅歌想做，並唔係話做歌手，有首歌就出來做。」言下之意，應該要有好歌，才能「請」得郁他。
「要唱歌真的需要過到自己，要一段時間沉殿一下，再感受一下音樂。」
今次展鵬好有機會得獎，但原來他不是首次出席《勁歌金曲》，他又謂：「曾經我都有去過勁歌金曲，當時都有唱電視劇集插曲，但我全程坐在觀眾席，我去過一年的。今年會唔會有（獎），我唔敢講。我哋真係負責去，始終係公司安排的工作，要我哋出席咩頒獎禮，我哋都要去。」
至於拍檔胡定欣，亦早已被公司安排出席《勁歌金曲》，她表示：「要出席，因為有歌入選，（得獎）我諗真係冇諗過呢樣嘢。畢竟係一首劇集歌，又冇行過台，真係好多謝觀眾，因為呢套劇集鍾意呢首歌，我哋都鍾意唱歌，當係一個PARTY！」被問到展鵬值不值得奪男歌手獎時，她又謂：「值得！展鵬唱歌咁好聽，知佢一路唱好多劇集歌曲，不需要懷疑！」
雖然TVB捧自己友無可厚非，不過只怕「越幫越忙」。翻查紀錄，TVB藝人普遍佔有優勢。09-11年度，連續三屆的「亞太區最受歡迎男歌手」都是由「親生仔」林峯奪得，不過間接導致TVB要取消此一獎項。而2011年，林峯更憑著《Chok》奪得金曲金獎，令樂迷譁然之餘，甚至有評論指，樂壇之死是由林峯憑《Chok》奪獎開始。
問到陳展鵬會否害怕步林峯後塵被受批評，他回應：「其實我唔怕，好多嘢都係公司機會和安排，其實我哋都係做好自己工作，呢個世界，劉備都會有敵人，曹操都會有知己，睇你用咩角度去睇。對我來說，有份參加頒獎禮，都要多謝公司機會，始終我真係不是歌手，而是演員，需要我出席就要出席。」
一直多謝公司，咁識講說話，看來很大機會繼《越難越愛》﹑《眼淚的秘密》後，同樣憑電視劇歌曲拿下「金曲金獎」喇，展鵬坦言：「(如果有)都會珍惜呢個獎，始終呢首歌亦係好多觀眾鍾意，希望未來一年都會有這些觀眾有共鳴的歌！」
「劉備都會有敵人，曹操都會有知己。」
首歌咁好聽，《勁歌金曲》舞台上，等住聽多次啦！