聲夢演唱會|何晉樂找數唱《李香蘭》獲激讚:冇諗過迴響咁大

撰文:劉傳謙
出版:更新:

一連四日《聲·夢飛行First Live On Stage》在昨晚(15/8)完滿落幕,何晉樂(Rock)接受《香港01》訪問,談起演唱會後感想,他形容四晚演出漸入佳境,又指在15位學員團結下,令整個演唱會順利舉行。他坦言對這個舞台感到不捨得:「離之前比賽事隔好耐,終於有機會15個人一齊完成一件好大嘅事情,今次影咗好多相,有好多嘅回憶。」

Rock直言唔捨得。(梁碧玲攝)

說到最搶眼的演出,非「隱藏的第二回合表演」《李香蘭》莫屬,早前JW接受訪問時也大讚Rock唱得動聽,而台下唱完後也報以熱烈掌聲。他稱在頭場演出以來就收到不少意見,認為自己在決賽當晚應該以《李香蘭》打頭陣,而他對當晚決定不感到後悔:「就算我輸咗比賽,最緊要喺大家心目中,呢首歌係好聽就夠。我冇諗過呢首歌迴響咁大,以為呢首歌大家已經聽慣聽熟,可能係大家冇聽過我唱,所以覺得好驚喜。」不過,《李香蘭》的演繹難度非常高,Rock坦言最初害怕會有失誤:「好多人建議我去聽日文原版,感受下原唱嘅情緒,所以我第一時間係唔知大家接唔接受我呢個唱法,好彩喺第一場,我唱到第二句就已經聽到歡呼聲,我就知我自己做啱咗。」

Rock唱《李香蘭》獲觀眾高度評價。(梁碧玲攝)

在與Gin Lee合唱《天黑黑》後,Rock突然在台上來段愛的宣言,感謝女朋友支持和付出,不過Rock指女朋友較喜歡低調,因此害怕她因自己過於高調而生氣:「我有問過佢嘅意見,佢叫我唔好咁高調,於是就建議自己做得被動少少,好似有人問我先再講會好啲。我真係好想多謝佢,因為佢喺背後幫助咗我好多,忍耐我行程表上好多嘅跳動,又成日煲湯畀我飲,感受到佢好支持我,所以我想藉一個大啲嘅舞台多謝佢。」被問到演唱會後最想做的一件事,Rock毫不猶豫地答:「食嘢!最想食日本嘢,頭先仲見到Sherman(潘靜文)喺度食壽司,佢唔驚肚痛咩?我真係唔得,忍下口,等我唱埋先,入面仲有一杯珍珠奶茶等緊我。」

Rock怕女朋友唔鍾意,一直考慮係咪要公開示愛。(梁碧玲攝)

點擊圖輯,重溫尾場精華:

+33
發表評論...