冼靖峰中秋狂食月餅 做Gym還債準備拍MV拍劇：自己知自己事
撰文：劉傳謙
出版：更新：
Archie與炎明熹、文凱婷、孫漢霖和蔡愷穎一同現身荃灣出席商演。（陳順禎攝）
冼靖峰（Archie）昨日（22/9）現身荃灣出席商場活動，先後演繹《到此為止》和《囍帖街》。他在活動後接受《香港01》訪問時指最近要同時兼顧拍劇和錄製新歌兩方面，又指自己第一首單曲由幕後班底依照自身經歷度身訂造，令自己相當期待：「我記得收到demo之後就好想同佢哋傾，而監製都好用心咁同我做好成首歌，去到錄音嘅時候又糾纏咗一排，諗緊點錄先好，都試過重新錄過，所以中間搞咗一大輪，依家終於到後期製作。」問到會否趕及在今年推出，Archie則指留待公司安排。
Archie感謝幕後團隊用心炮製自己的第一首個人單曲，期待能盡快推出。（陳順禎攝）
不過Archie坦言，適逢中秋佳節，自己不停吃月餅應節，更透露兒時一個吃月餅習慣：「我細個鍾意直接食成嚿月餅，唔切開，一攞起就食，個感覺好爽。咁當然係講緊以前啦，依家都講究衛生。」不過為了拍劇及準備拍MV，Archie隨後也開始做Gym減肥，又笑說：「依家咁都唔係好差啫！哈哈，不過我自己知自己事，會睇下有冇機會做返多啲運動，因為呢排真係特別忙。（點減肥？）主要都係做Gym同食清淡啲，但係依家好多時拍攝都要喺出面，我會自己帶飯或者買啲好清淡嘅嘢食，例如沙律。可能未必周圍都有，係有啲麻煩，但係盡量做。」
Archie透過運動及飲食努力令身材維持最佳狀態。（陳順禎攝）