【消失的海報】憂恐懼會傳染 達明一派:唔想只為對抗政權而創作

最後更新日期:

達明一派的海報在港鐵站突然「被下架」(【消失的海報】達明一派港鐵海報被下架 明哥:2017將會雞犬不寧 ),黃耀明半夜在網上連出兩post感慨:「不過原來這個社會真的有人什麼都恐懼,他們恐懼到一個地步,連跟我們站在同一個照片框內都怕得要死,所以最後唔知『係人定係鬼』那『無形的手』令到這張宣傳海報要下架、消失了。」

達明今日接受《香港01》訪問時,他們坦言:「既然佢唔想畀人知,我明白佢既感受,佢承受唔到呢個笑話。希望佢都明白我地嘅感受,唔希望呢種恐懼像傳染病繼續蔓延下去。我尊重佢所以唔開名,但我都希望佢尊重我,等我講呢一個故事出來讓人知道而有所警剔,如果呢啲事繼續無聲無息發生,香港會玩完,我們同各位講返件事,唔想只係遺憾,希望發生在我們件事,唔會再在另一人身上發生。」

明哥又提到,事件令演唱會錯失了幾個星期的宣傳,「公眾地方見唔到原本想用的海報,本來好玩的一張海報都做唔到,都要有6位數成本,重新設計過,所以要用另一筆錢,但都係唱片公司繼續支持。」幸好有唱片公司為達明遮風擋雨。

達明一派的海報被下架了。(Instagram圖片)

與政治無關?

達明一派今日剛好到商台宣傳,接受DJ訪問時,明哥亦有回應事件,他澄清其實今次的事與政治無直接關係,反而是在海報中出現的其中一個人感到懼怕:「大家一定想問Juicy嘢,會好好奇係邊個想下架,但我都唔想講係邊個,因為嗰個人真係好驚,對方話有好多工作喺內地,驚個海報影響佢,其實海報入面有成80個人,入面個個都人唔似人,達明唔似達明,都混合咗,但既然佢咁驚,公司老闆都覺得唔好阻人哋發達,唔好阻到人工作,決定下架。」

明哥又講到其實沒有直接與對方聯絡,但這種事最怕是麻煩到中間人:「但我覺得依種事係要講出嚟,如果唔係好多嘢都會被無聲消失。」問到當初可有想過會有人如此擔心?明哥表示拍攝的時候也有想過,所以是向別人買相片的版權,卻忽略大家可能會覺得反感。明哥直言:「可能裡面有更多人更驚,例如特首候選人,更中央嘅人都有,喺好後排出現咗,但原來有人驚過佢哋。」

明哥直言現在的情況愈來愈似反烏托邦小說《1984》的內容,而演唱會剛好亦是在《1984》取材,談到達明一派的風格向來很有社會性,明哥感慨說:「以為過了80、90年代有個蜜月期,都OK吖,一切好和諧,點知好景不常,末世情懷要回來了,可悲可笑的感覺幾嚴重。」

達明一派坦言早已預到被封殺,但最擔心香港會因恐懼而被避某些題材。(林迅景攝)

「達明」被內地音樂App下架

至於被問到年頭有內地音樂程式,將香港和台灣部分藝人的音樂作品下架,達明回應指:「都唔係新鮮事,其實我們預計會發生,我覺得係好遺憾,因為損失係樂迷,廣大樂迷沒有選擇,繼續確認內地社會是沒有選擇的社會,胸襟不夠廣闊的政權,點解佢地咁怕一首兩首流行曲?點解堂堂大國會怕一首歌?好奇怪。」

達明又提到:「我們其實唔想只係為左對抗呢種現象而寫歌,本來我們唔想咁政治,音樂唔應該只係關於咁樣,但社會氣氛真係幾壞,令我們不可以唔做,我們更驚社會越來越多人唔敢創作呢種題材,這是我們更憂慮的。」

達明一派今天身穿「絕版」Tee現身。(林迅景攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。