金曲頒獎禮｜姚焯菲未開學有空參加記招　與吳業坤同場成焦點

姚焯菲（Chantel）今日（1/5）現身電視城，出席《金曲頒獎典禮2021/2022》記招。有別炎明熹（Gigi）因上課而缺席頒獎禮，Chantel透露目前尚在放假，因此有空出席記招，而她與吳業坤再次同場，成為另類焦點。她在記招前接受《香港01》訪問，直言面對新學期即將開始有點緊張：「依家係未開學嘅，但係有啲緊張，唔知點解，可能驚唔適應，但係應該可以嘅。」

接連在叱咤、新城贏得新人獎，Chantel坦言喜出望外，感恩得到外界認同，不過談到元旦日要提前離開叱咤會場，Chantel坦言：「呢樣嘢一開始都冇諗過，但係我覺得1月1日可以畀我哋開到演唱會，其實係好幸福，雖然係錯過咗頒獎典禮，但係之後可以有一個咁大型嘅騷畀我哋參與，其實都好開心。不過都希望之後可以喺場館留耐啲，睇耐啲，但係嗰日已經好滿足。（錯過聽MC唱歌會唔會可惜？）都唔會嘅。」Chantel又說近日有與家人吃蛋糕，慶祝在新人年得到好成績。