關心妍演唱會|搞聚會幫蕭正楠麥浚龍和好?Jade:我破唔到冰㗎喎

撰文:劉傳謙
出版:更新:

一連兩晚在紅館舉行的《關心妍 Jade Kwan 約 20週年演唱會》,於昨晚(5/6)完滿結束。Jade本來以《關心...心妍》和《你有心》為個唱劃上句號,但在歌迷不斷高呼Encore下,Jade再度上台,以《放生》報答歌迷熱烈支持,最後更向觀眾送上飛吻。

Jade一連兩晚20周年紅館個唱完滿結束。(梁碧玲攝)

騷後Jade在後台接受傳媒訪問時,坦言沒想過觀眾反應會如此熱情。說起兩晚演出驚喜連連,Jade也說歌迷眼中最大驚喜應該是囡囡心心在台上打筋斗:「我今日都覺得驚喜,因為第一場佢打咗4個,我驚佢會緊張,一緊張就手軟,於是叫佢唔好打咁多個,冇諗過佢今晚(昨晚)打6個,我呆咗,睇落真係愈打愈有。我都為佢嘅勇敢覺得好驕傲。」

而對丈夫楊長智(Jonas)而言,最大驚喜莫過於心心在台上提出要唱生日歌送給他,不過Jade笑說害怕心心守不住秘密,令驚喜被識穿:「可能今日(昨日)講完,佢就轉個頭話畀老豆聽,所以我等爸爸出咗門口先搵佢夾,叫佢要自己講,請大家唱首生日歌,佢都練咗一陣。頭先呢個秘密冇穿到,我覺得好開心,因為我哋冇乜嘢可以送畀爸爸,佢為咗今次演唱會真係勞心勞力,連慶祝都未諗,所以好多謝在場每一位觀眾唱首生日歌畀佢。(爸爸冇諗過?)佢唔知嘅,頭先有記者朋友話佢塊面紅晒,我唔應該咁整蠱佢。」

而對尾場觀眾而言,最大驚喜莫過於鄭秀文(Sammi)在演唱會接近尾聲時現身,Jade解釋自己在Sammi的歌曲身上得到很大鼓勵,渡過人生上的各種難關,於是決定嘗試邀請對方。今次Jade除了親自寫信邀請對方,更親手製作零食籃送給Sammi,希望向對方表達誠意,至於Sammi在台上揭露Jade有意視這個20周年演唱會為最後一個個唱,Jade坦言:「我都有同佢講,對上一次喺紅館開騷已經係10年前,甚至上一次開騷係8年前。真係好艱難,我真係唔知仲有冇機會可以再喺紅館開演唱會,如果呢個係最後一個嘅話,我希望可以邀請一啲對我嘅生命嚟講好重要,畀我好大鼓勵嘅人。所以佢都有話『唔可以係最後一個呀』,但係因為真係艱難,唔係咁容易就搞得到,所以我真係當最後一個咁做。」

Jade連續兩晚都有邀請蕭正楠(Edwin)做嘉賓,她感謝Edwin在忙於拍劇期間仍一口答應,甚至做足兩場嘉賓。二人在昨晚也談起另一位同年出道的新人麥浚龍(Juno),Edwin更主動談起,如果Juno決定開20周年個唱,希望也可以獲邀擔任嘉賓。Jade稱近來與Juno甚少聯絡,但希望可以與同年出道的余文樂、Cookies等歌手相約,來場聚會。被問到假若重聚能夠成事,會否幫忙為Edwin和Juno破冰,Jade笑說:「我破唔到冰㗎喎。真係唔知,其實要約晒咁多個都唔容易,私底下有啲20年前嘅歌手都有聯絡,但係我同Edwin都好耐冇聯絡,上次見已經係啱啱生完BB拍《美女廚房》。希望遲啲大家真係可以聚一聚。」