陳蕾為新歌獻舞技 邀《造星V》4子拍MV

撰文:鄺鈺瑩
出版:更新:
陳蕾搵《造星V》嘅參賽者(Tiger、Nathan、Kim、亨仔)一齊拍MV。

陳蕾推出新歌《伸縮自如的愛》, 日前拍攝MV時,更大騷舞技,又笑言自己一定跳得比洪嘉豪好,但問到有份打算做跳唱歌手,佢就表示:「呢個我自己又唔方便講嘅,你可以問返排舞老師!」至於點解會突然想跳舞,陳蕾解釋因為擔任《造星V》導師之故:「睇住有某啲原本手腳唔係好協調嘅學員喺苦練之下都跳到,就比咗啲動力令我覺得,呢班人都得,我係咪都可以呢?於是就膽粗粗同公司提議,不如我都試吓跳舞!」陳蕾仲自爆以曾與鄧小巧一齊學跳舞,點知原來對方所學嘅係New Jazz,「徹底擊潰咗我對跳舞呢一個技能嘅開發!上完之後我覺得我完全唔適合跳舞!」

陳蕾話下個MV可能玩吓雜耍。

MV中,陳蕾更搵嚟《造星V》嘅四位參賽者Tiger、Nathan、Kim以及亨仔,她解釋是因為他們都有擅長的樂器。「既然可能都要搵人去演繹返MV嘅彈奏部分,不如試吓搵年輕人或者係新認識嘅新朋友去參與MV啦,所以就搵咗佢哋四個去幫我一齊完成呢個MV。」