張敬軒美國巡唱40度高溫真空上陣　台下歌迷要求除衫兼除褲

張敬軒上月完成香港一連十一場的《Revisit張敬軒演唱會》後，坐私人飛機前往拉斯維加斯開始美國巡演。由於賭城氣溫高達四十度，張敬軒特別訂造新歌衫真空上陣兼露腰，酷熱天氣下實行來一個大解放！

張敬軒為了拉斯維加斯的炎熱天氣特別準備了全新戰衣，開場穿上黑色馬甲Deep V開到落肚臍外，亦有真空上陣配搭黑色西裝。軒仔指自己身上的歌衫是特別為拉斯維加斯而訂製，台下歌迷立即大叫「除衫」，他隨即回答：「吓？除衫？咩除衫呀？數學嗰啲『除三』呀？九除三等如三。唔緊要啦，除晒就唔好睇㗎啦，你返到屋企除咗咪同我一樣。」

軒仔之後又調侃台下女歌迷講到：「而家年代真係唔同，而家啲女仔點解會咁大聲叫人除衫？我想問你哋對住你哋嘅男朋友係咪都係咁？睇吓你哋身邊嘅男士冇反應，你哋可以當住佢面對第二啲男人除衫。」話口未完，便有男歌迷大叫「除褲」，全場立即歡呼，他即奸笑道：「等我操吓先啦，我真係唔敢。今日有小朋友喺度，千祈唔好誤導咗啲小朋友，叔叔啱啱喺度晨運。」場面爆笑。