鄭少秋紅館開騷 對欣宜感覺慚愧:I'm proud of you

撰文:
最後更新日期:

鄭少秋假紅館舉行《鄭少秋半世紀‧大時代世界巡迴演唱會》頭場,獲冼國林夫婦、張德蘭夫婦、苗可秀、吳剛與兒子、古巨基等到場支持。演唱會舞台設計得像七、八十年代的歌廳一樣,開場時燈光配合到金光閃閃,相當有氣派。

還站在皇冠舞台升到半空。(符祥定攝)

秋官先以名曲《輪流轉》為演唱會拉起序幕,隨着音樂播放,秋官站在皇冠型舞台升到3層樓高,期間更有火花特效,驚喜萬分!回到地面後,秋官就和大家打招呼,又不停用金禧的「金」字食字造句:「今次係咪好金啊,衫又金,台又金,仲要一開台就吊到我咁高出場,都咪話唔甘,但又型又靚仔幾金都抵嘅。」他又感謝歌迷和他一起度過50年的黃金歲月,大家一起分甘同味回憶過去的黃金歲月。

秋官於紅館開騷。(符祥定攝)

接着秋官一口氣唱了《命運遊戲》、《男人四》和《變》三首跳舞快歌。秋官勁歌熱舞過後就問大家鍾唔鍾意:「真係鍾意我?鍾意要大聲啲講,唔係就好似丁蟹咁,等阿玲死咗先知最愛係方進新。」適逢過幾日端午節,他又提起屈原的愛國事跡,並唱出《男兒着眼天地光》。

秋官笑言今次演唱會好「金」。(符祥定攝)

換上黑色長褸的秋官再回到台上,並唱出《天涯孤客》,他直言要成就一個時代需要好多奮鬥,自己是一個好彩的藝人,16歲就有個明星夢,投考過三間電影公司的藝人訓練班卻不成功:「後來我發現個時啲人鍾意小鮮肉,我就冇咩肉,後尾我先知有啲人笑我得嗰半邊人(瘦到的半個人分量),學咩人做明星。」

金禧紀念騷點少得放煙花。(符祥定攝)

幸好,秋官後來遇上好老師好朋友,正式成為藝人,1971年更出推了唱片,他又再唱了一首《愛人結婚了》。秋官又提起當年拍了無綫的第一套長篇武俠劇《書劍恩仇錄》,一身分飾三角:「嗰時拍劇好辛苦,30-40度拍外景,頭套除出嚟水殼咁㗎,仲日日騎馬,騎到嗰度都損晒,人哋八月十五又圓又靚,我就月缺月圓咁。」

秋官大晒過去瘦削的相片。(符祥定攝)

唱到《誓不低頭》時,囡囡鄭欣宜(Joyce)突然走到台上和秋官合唱,Joyce笑言:「好多人問我點解成日人唔好低頭,因為我係流住誓不低頭嘅血㗎嘛!」秋官又感言講到:「我覺得慚愧,咁多年係娛樂圈完全冇幫到你啲咩,你今日嘅成績係你自己撐返嚟嘅。我講英文吖,I'm proud of you。」他又叫觀眾在未來的日子要繼續支持Joyce。

秋官:「我個乖女,女神啊!」。(符祥定攝)

Joyce獨唱《女神》。(符祥定攝)



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。