【一首歌】張繼聰《寧願晏D訓》家務兩份分 「個家我有份」

撰文:彭嘉彬
出版:更新:

劇集《不懂撒嬌的女人》警示港男,女性不再是事必要包辦所有家務,甚至極端一點,不少像Mall姐的女強人,工作像是生活的全部,回家做家務的責任,分分鐘落在男伴身上。做家務可說是男女關係中恆久的爭拗點,家中不同角落彷彿也是兵家必爭之地,男人老奉唔洗碗,女人唔識換燈膽,聽都聽得多。唔少情侶,甚至夫妻因為家務分配而嘈交。講到尾,都係雙方願意為伴侶付出幾多,改變幾多,又或者直白啲講,最終都係一句「你夠唔夠愛我」。其實就好似《春嬌救志明》入面講嘅一樣,愛一個人係要學識長大,無謂因為做咗啲咩或者無做啲咩而破壞一段關係。呢方面,其實張繼聰可以話係樂壇中嘅佼佼者,皆因好多年前佢寫嘅歌已經講緊同樣嘅事情。

《寧願晏D訓》收錄於2007年張繼聰第三張個人專輯《Kidult》,親自作曲並與林健華共同監製,黃仲凱作詞,Goro Wong編曲。那年,張繼聰得到「叱咤樂壇作曲人大獎」。作為張繼聰較早期的歌曲,曲風充滿個人色彩,而後期他的個人作品已較少這類R&B曲式。歌曲內容相當甜蜜,明顯是寫給當時新婚的太太謝安琪,訴說著自己的愛妻生活,也像是自己由「大細路」轉變成大人的自白「寧願晏D訓 要似個大人」。