【有片】翟威廉原來勁唱得 孖麥明詩開Live超吸睛：有女先唔悶
一個藝人如果要宣傳，最簡單而又唔需要成本嘅方法，就係好好運用自己嘅社交平台。「8料港男冠軍」翟威廉最近就喺自己FB動作頻頻，大玩FB live音樂節目，當然「一支公」緊係dry啦，所以就搵嚟一班tvb嘅好朋友一齊jam歌搞搞氣氛，更重要嘅係有好多女神，保證網民睇到心心眼。翟威廉：「唔可以淨係得班仔，緊係要有女仔先唔悶啦。」
曾經接受《香港01》專訪時講過「好耐冇諗過未來」嘅翟威廉，最近發起網絡攻勢，喺fb live同一班藝人好朋友jam歌，除左有最近傳緋聞嘅劉佩玥及周志文外，亦有周志康及林師傑等「巨聲」靚聲助陣。不過翟威廉都相當識do，都有照顧到一班男網友嘅感受，請嚟2011年度香港小姐冠軍朱晨麗，2013年度香港小姐友誼小姐歐陽巧瑩，而前晚（６月１日）更搵嚟2015年度香港小姐冠軍麥明詩，你真係咪話唔「吸晴」，不過係葡萄啲囉。
翟威廉：「我一直都有開FB live同大家jam歌架，因為jam歌氣氛好呀嘛，我唔叻自己對住鏡頭講嘢。我希望可以每星期都開2至3次fb live jam歌，同大家互動一下，加上嚟緊公司就嚟開Big Big Channel，所以都想我哋用多啲fb live。」（有無諗過學鄭世豪轉戰樂壇？）翟威廉謙虛表示：「唔得啦，我正係識玩樂器唱兩句，我才能未到專業，我呢啲係低成本音樂節目，只係想同大家玩下，放鬆下，同職業級仲差好遠，我都係做演員同主持好啲。」
翟威廉：我公司有好多人好容易取替我
今次呢個歷時差唔多兩個鐘嘅fb live大家除左可以睇到翟威廉，大細孖（周志康，周志文）及麥明詩嘅音樂才華外，當中都有唔少笑料，當佢哋唱到第6首歌《唯獨你是不可取替》時，麥明詩突然爆出一句：「其實無人係唔可以被取替，因為你（翟威廉）都好容易被取替」翟威廉馬上腦筋急轉彎表示：「由其是我公司，好多人好容易取替我架，TVB啲劇唔搵我做，搵咗第二個人去做。」大細孖即時再加鹽加醋：「最近有一個殺到埋身喎，有一個好似你，但高你三個頭嗰位..」翟威廉即時抵死表示：「唉…本身個嗰（角色）比我做嘅，但比佢（袁文傑）做咗啦，真係『唯獨我是可取替』呀！」當佢哋四位合唱完《唯獨你是不可取替時》嘅時候，做慣主持嘅翟威廉自己為自己打圚場：「我仲有兒童節目所以都唔會被人取替嘅。」
翟威廉接受電話訪問時，問到佢「游生」哩個角色係唔係真係被袁文傑搶走，佢笑哂口咁話：「大家120%講笑，因為有好多人話我同袁文傑似樣，所以大家搵我嚟開玩笑。唔止今次，我哋嘅FB live成日講笑吹水，咁先開心呀嘛，而家諗起都覺得好好好笑。」
唔少人都上過翟威廉的「音樂節目」，個個好「高質」。(下圖有驚喜)
公器私用識女仔？
問到翟威廉，哩個音樂節目請嚟咁多位「港姐級嘉賓」，實情係唔係公器私用，幫自己及一班兄弟搵女朋友，翟威廉表示：「你係唔係想講阿文（周志文）同埋阿moon（劉佩玥）緋聞？緊係唔係啦，我哋成班好都識咗好多年，都係好朋友。做哩啲節目唔可以淨係得班仔，緊係要有女仔先唔悶啦。（你覺得明詩唱得好唔好？）佢唱歌當然ok啦，又敢唱，好多歌都好熟。」
麥明詩亦有接受《香港01》訪問回應表示：「其實翟威廉音樂根基穩扎，佢除咗唱歌好，又識彈結他，又識彈琴，仲要即時live演奏，所以佢嘅音樂功力係好深厚。（你會唔會再想encore？）其實佢喺個大group到邀請好多人嘅，如果我得閒都會上去玩下，又可以娛樂一下大家，又可以消磨一下時間。」