去完工作假期，見工應該隱瞞嗎？搵工同拍拖一樣：最緊要夾！
「我去完Working Holiday一年，下星期見工應該點解釋嗰段空窗期？」、「我辭職原因係舊上司好賤格，見新工應該照直講？」寫咗職場分享差不多兩年，幾乎每個星期都有讀者喺臉書Inbox問我呢啲問題，其實見工要答乜嘢先符合HR同老闆期望？
撰文：詩寧
讀者總係希望我直接畀個答案佢，但唔好意思，我從來唔會咁做，因為見工同拍拖一樣，係無Model Answer的，每一個唔同嘅男朋友／面試官有唔同嘅喜好，而你每一次戀愛／見工都要付出唔同嘅心思，先知邊個伴侶／邊份工作同你係Perfect Match。所以見工過程，永遠無一個答案會符合所有人嘅期望，你亦永遠唔會知道聽嘅人腦入面點樣接收同翻譯你個答案。舉一個例子：
Jennifer做緊份工唔係咁開心，而呢個時候佢外公身體抱恙，長期需要家人陪同覆診。經過一輪考慮、同家人商議之後，Jennifer決定裸辭留喺屋企照顧外公。
大約九個月之後，Jennifer外公身體好轉，Jennifer亦開始出返嚟做嘢，每當面試官問佢：「上一份工點解辭職？九個月工作空窗期你做過乜？」
Jennifer每次都實話實說，結果一次又一次的「回家等消息」，然後佢開始覺得面試官可能唔鐘意佢為咗屋企人而辭職，所以佢開始講各樣大話例如去旅行、公司改革、想轉工尋找挑戰性……但由於係大話，被面試官問多兩問就心虛口窒窒，或者係轉數唔夠快上文唔接下理，面試官見人見得多，好易知道Candidate係咩人、講嘢幾成真，所以Jennifer繼續都係「回家等消息」。
究竟要答咩答案先啱？
除咗有關技能方面嘅問題係著重實質內容之外，其他如「點解辭職」之類嘅問題，當中所答內容未必係重點，重點係你「如何表達和包裝」，面試官都有家人，其實唔難明白Jennifer為咗照顧家人而辭職嘅無奈，不過Jennifer忘記咗解釋原因嘅同時要強調自己已經準備好重新工作，例如，喺照顧外公嗰時有無繼續留意行業發展？有無學習新技能、睇書或者進修下保持競爭力？
講真一日有24小時，假設用10小時照顧家人，其實都仲可以每日抽1,2小時出嚟留意行業資訊，防止自己脫節。香港速度快，個個僱主都希望員工一返工就立即上手，發展所長，唔想請空窗期長嘅人係因為怕僱員要長時間適應同摸索，驚請咗人都係踢晒腳。
所以裸唔裸辭、基於咩原因而辭職都唔係問題，問題係份新工同你夾唔夾，同埋見工嗰時識唔識突出自己嘅工作能力同經驗，講到尾，見工都要識執生。