【新居屋2019】6大屋苑位置 隨時影響老闆印象 哪區最有錢途?

撰文:
最後更新日期:

「哎呀,房委會個網Down咗呀!」同事Peter於5月23日的早上喺Office大叫咗一句。話說新一期居屋及白居二計劃的申請表格開始派發,Office入面有幾個同事都打算抽,今期居屋一共有六個屋苑,我問Peter:「心儀邊個屋苑呀?」佢拋出一個香港人唔會陌生嘅答案:「有得揀咩?住邊都好啦!最緊要有得住!」

作者:詩寧

居住區域,或暗暗影響升職?

一向住新界嘅我,就深深明白「住邊度」對職場發展有不明文嘅影響。

例如,有部份細公司,請人會考慮埋求職者住邊區,因為公司資源有限,老闆希望請個有錢嘅員工,可以利用埋佢嘅人際網絡,帶更多生意畀公司,而大家都會普遍覺得,住九龍塘嘅人,見識一定多過住大埔嘅人。

(《她的私生活》劇照)

除此之外,大家坦白點,的確有唔少職場賤人見高拜見低踩,兩個同Grade同事相比,住跑馬地私樓嘅同事,得到嘅禮貌同尊重會比住天水圍居屋嘅同事多,除非你下下同人講:「我住天水圍,括弧業主。」但現實中,人哋問你住邊,你只會答:「天水圍」由呢刻開始,喺對方心目中,你額頭就寫住「冇錢冇人脈」,亦好易直覺認為你係手停口停,無咗份工唔得,工作上遇到難哽嘢,當然係塞畀你啦,因為你無人脈,唔使驚得罪你;因為你無錢,就算難頂,你都唔會輕易辭職。又除非,你有意無意話人知你未婚夫住薄扶林,咁又可以扭轉觀感改變命運喇。

(《假裝熱情》劇照)

住新界,真係比較「蝕底」?

住邊區,唔多唔少會影響到其他人對你嘅感覺。喺呢方面,今期居屋六個屋苑分別有:何文田冠德苑、將軍澳雍明苑、馬鞍山錦暉苑、長沙灣凱德苑、火炭旭禾苑及荃灣尚文苑。呢啲區算唔錯,聽落去唔會「太窮」。除此之外,以上地區附近都有唔少工作以供選擇,唔使每日花兩三個鐘於交通之上,就算去遠少少,起碼呢啲區嘅交通配套都唔會太差。

我呢個新界人話你知,初初你可能覺得返份遠少少嘅工唔緊要,但耐咗就深深體會到車程長好輸蝕。假設公司喺灣仔,放工時間係6點,新界同事即走返到屋企都7點半,塞一塞車就8點後;隔離位同事住銅鑼灣,佢「扮工」到7點畀老闆讚完、返屋企沖埋涼,新界同事先剛剛離開架巴士。如果遇著一個鐘意員工OT嘅老闆,住得辟真係無得鬥,戰爭未開始就輸咗。

新一期居屋,邊個屋苑可以方便你返工「扮有錢」?(點圖即看==>)

+2

如果老闆因為「住得窮」而挑剔你,其實......

作為一個辛辛苦苦儲錢做樓奴嘅打工仔,我當然認同Peter嗰句「有得揀咩?住邊都好啦!最緊要有得住!」如果個老闆因為你「住得窮」而挑剔你,你唔需要自卑,因為佢都富極有限,佢笑你住元朗嘅同時,可能佢自己都只係住北角,試問,李嘉誠又點會需要員工用人脈去帶挈佢吖。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。