如何面對辦公室「政治」:忠於立埸即失勢?最忌牆頭草搵「著數」

撰文:
最後更新日期:

(《1987:逆權公民》劇照)

近呢個月打開電視或社交媒體,多數都係遊行示威或警民衝突嘅畫面,你有無諗過呢啲新聞都間接影響緊你仕途?早排聽過一個傳聞,話投考警察嘅時候其中一條問題係:「如果遇到學生示威者衝擊警察防線,你打唔打落去?」係真定假無從稽考。但近年「政治」風氣盛,個人立場亦唔多唔少影響緊你職場條路。

作者:詩寧

審查完社交媒體帳戶先決定有無Interview?

話說我老闆係個非常支持建制嘅人,佢幾乎每朝都破口大罵近日嘅遊行活動。最近,公司想喺我Team開個新Post,老闆叫我同佢一齊In人,點知入房之前佢突然講咗句:「詩寧,你估會唔會有啲黃絲嚟見工呢?希望唔好請到啲搞搞震嘅人嚟公司啦。」我笑一笑無答佢,因為公司入面本身就已經有唔少同事有參加遊行。

(《自體發光辦公室》劇照)

見咗兩個求職者,都係普普通通唔特別出眾,結果見到第三個,佢表達能力清晰,學歷同工作經驗都好符合個Post嘅要求,我同老闆都覺得佢應該係獨立處事能力唔錯的,請咗返嚟唔使花太多時間教,幾鐘意佢。點知老闆突然問個求職者:「你點睇最近啲遊行新聞呀?贊唔贊成警察拉班暴徒?」老闆口中「暴徒」二字就已經清楚表明咗自己立場,個求職者碌大對眼望下老闆又望下我,兩秒之後佢答:「陳生,嗰班唔係暴徒,係和平表達訴求嘅示威者,反而係警察使用過多不必要嘅暴力。」輪到老闆碌大對眼、黑住面咁點點頭「嗯」咗一聲,然後向HR打咗個眼色,HR就叫求職者返去等消息。

延伸閱讀:

同公司性格不合 不如提早分手?求職免中伏心得:見工最緊要八卦

衰老闆有樣睇!出問題不道歉反埋怨下屬 遇「割席」上司如何自處

老闆最後無請呢位求職者。但事情仲未完結,如果係上述兜口兜面問政治立場,你都有得自己決定講真話定瞞天過海,不過經過呢個求職者之後,老闆直情叫HR預先睇下每個求職者嘅社交媒體,審查一次先叫人嚟In,無論你係黃定藍,提提大家記得好好保護帳戶私隱。

參與遊行即失勢?

Jessica同Zoe 兩個都係老闆愛將,一直勢均力敵爭得好緊要,老闆每遇到疑問,都會分別召見Jessica同Zoe,問完佢哋意見先再作決定。點知6月12日之後,老闆就再無叫過Jessica入房。

(《幕後之王》劇照)

原因就係Jessica 6月12日請咗假去遊行,仲要Send咗相去同事Group分享,結果就畀人出賣,自此老闆認定Jessica係滋事份子,好似忘記晒佢對公司付出過咩努力、有過咩成績…..對手Zoe就輕鬆上位了。

所以,你可以去做自己認為啱嘅事,但唔一定要打卡畀人知,有啲嘢你付出咗汗水、表達咗心意,唔使太高調。

可以企左企右企中間,但唔好跳來跳去

我相信總有Office出現「支持」同「反對」聲音互相爭辯的情況,最少雙方都係有自己睇法嘅人,而最可惡係嗰班無立場只睇邊面有「著數」就企邊面的同事──即係牆頭草,例如B君明知老闆係藍絲,就係咁喺老闆面前講最憎人搞事呀、衝擊好暴力……但當成班黃絲同事一齊Lunch嘅時候,B君就會話班學生好有毅力呀、遍地開花做得好……

(《我要準時下班》劇照)

以為咁樣買晒兩邊Sure Win?大家看在眼裡唔踢爆你,唔等於全部人都傻的,喺大是大非之下都左搖右擺,第日有重要Project點敢交畀你?有重要職位點敢留畀你?

你不愛政治,政治還是會找上你,平時已經要防「辦公室政治」,而家連「社會政治」都入埋Office,避唔到,不如好好了解下新聞,再問下自己想企喺邊,遇到唔同人問你取態嘅時候應該點樣答比較好吧。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。