【瞓身追失車】客貨車失而復得 車主：佢係我全副身家
上月底，一個普通而平凡的深宵，運報客貨車司機黃先生，如常運送報紙到旺角大小報攤及便利店。平凡的夜晚，黃先生卻遇上不平凡的事。
7月22日凌晨3時許，黃先生將其韓國製客貨車，駛到旺角亞皆老街與塘尾道交界，將車停放在一間便利店門外，司機叔叔派報紙純熟迅速送出，但僅僅20秒之間，客貨車卻被人當街當巷搶走。
黃當時見狀非常心急，「搵食車嚟！」於是即時雙腳與客貨車「賽跑」，及至一個燈口位時成功追上，「成龍上身」擋在車頭兼捉住水撥，可惜搶車賊未有就範，狂踩油門「頭搖又尾擺」，終將黃先生甩開，他墮地受傷。昨日（16日）警方「O記」探員將該名偷車賊捉拿，而被偷走的客貨車亦被尋回，連車帶報紙原封不動，並無損傷。
《香港01》記者今日凌晨約3時，重返上址便利店守候，及至凌晨約4時半，黃先生駕駛一輛日本製客貨車，到便利店派報紙。當見到記者手執相機上前時，他的第一反應是：「唔好影相呀！」記者道明來意，他才稍為降低戒備，他解釋：「我唔想上鏡，事件到而家幾個星期，不少親戚朋友行家，成日問起呢單嘢、問到心都煩。因為我只係普通人，唔想承受太大壓力呀，只係想事件盡快告一段落。」
對於警方破案，客貨車失而復得，黃先生表示：「當然開心，但而家心情其實好複雜，頭先去完差館搞手續，但未知幾時先拎得返架車，應該無咁快。而家最想係盡快領回客貨車。」問及為何會不要命似的「瞓身」追車，他直言：「架車新買，每月要供5,000元，供5年，大約30萬。佢係我全副身家呀！」苦惱中的他，卻又笑指：「最慘係供緊嘛，供完都叫做已出之物……而家搵返架車，但都可能會賣車、換車……始終經歷過俾人搶車。」
可惜當時他未能追回愛車，更被甩在地上，「喺地下打幾個筋斗、碌咗好多個圈，成身損晒，睇醫生都睇咗6,000蚊。」至於今日駕駛的日本客貨車，他稱是向汽車公司租用，不過未有提及租車開工，令他要額外花費多少。而愛低調的黃先生，送完貨後迅即離開便利店，繼續趕到下一個地點派送報刊，繼續其平凡生活。
