【澳門立會選舉】記者講師到從政 屢敗屢戰林玉鳳:需要中間力量

撰文:
最後更新日期:

無情颱風天鴿摧殘澳門,造成10死及大規模的經濟損失,亦揭示政府各部門管理及應變上的問題,適逢立法會選舉將於本周日(9月17日)舉行,不同路線、不同陣營的新勢力均磨拳擦掌,希望為傳統勢力主導多年的立法會帶來新衝擊。

曾任電視台記者,現任大學講師及河北省政協等身份,打專業人士旗號的林玉鳳三戰立會,她主要走中間路線推動社會前進,認為澳門人雖偏向穩定保守派,但逐漸不再懼怕政治,尤其看見新一代希望開放改變的力量愈來愈大。林玉鳳認為於風災中,澳門政府由預警、救災至人手調動均暴露出問題,感到災後社會有股力量,「係時候畀啲顏色政府睇」。

林玉鳳第三度出戰立法會選舉,坦言信心有比過去兩屆大。(魯嘉裕攝)

打著專業獨立旗號,第三度出戰立法會選舉的林玉鳳曾任電視台記者多年,其後於大學擔起教職,2008年組成「公民監察」後翌年參戰立會,走中間路線的方向一直保持至今,「以前覺得澳門有啲似香港咁分兩邊,你講嘢我一定反對。但做記者經驗話我知唔係咁,保守同激進嘅力量都要有,但不足以將社會健康向前推」。她舉例指,不少西方國家的發展,都需要中間力量去穩住及推進。她指而澳門於過去十多年社會變得富裕,推行免費教育後亦培育出更多大學生,希望可以集中這些力量作出改變。

林玉鳳認為澳門政府於風災中由預警、救災至人手調動均暴露出問題。(資料圖片)

風災後現憤怒的力量 未足以左右大局

林玉鳳認為於風災中,澳門政府由預警、救災至人手調動均暴露出問題,揭示出政府內部專業能力及問責體制出現問題,「唔相信氣象局無專業人員,但判定風球係咪根據分析員既分析,定係由一啲唔識嘅人去行政干預,呢樣好有疑問。個管治體制出事咁耐,係因為冇問責,做錯嘢唔使負責,所以從來無吸收過經驗」,林玉鳳指感到災後社會有股力量,「係時候畀啲顏色政府睇」。

經濟仍好可穩住不滿

於天鴿風災後,林玉鳳認為澳門多了一股「憤怒的力量」,多了市民表達對政府及現行議會不滿,這種情況是過去較少出現的,她認為,情況會對選情有影響,但相信改變不會太大,因澳門暫時仍能以經濟穩住局面,「好似2009年歐文龍貪污案時都有好多人憤怒,到2013年又有啲事件發生(反離補法),但結果又唔係有好大改變,主要係澳門經濟咁多年都係好,即使(風災)頭一星期政府反應好慢,好多嘢處理唔合格,但之後派錢安撫,到𠵱家叫做挽回番少少」。林玉鳳又指,於災後可見傳統社團依舊有較多資源救災,於力量上亦是能穩住民心,因此認為風災未必會改變整個議會格局。

記者、老師身份變換 堅持自由發聲

曾兩屆参選落敗,面對第三次選情林玉鳳直言今次信心較大,「以前做記者、老師,係人地嚟求你、尊重你,到第一次參選先發覺有人會唔鍾意你,起初都唔習慣」。她稱後來漸漸了解如何與公眾溝通、接觸個案,才懂得如何將社會服務與自己的專業結合,「以前有人搵我幫手,我覺得我幫唔到,團隊入面好多人係學者,冇人識落手落腳做,之後慢慢搞聯署、寫信籌款等,再變做議題推動,結合番自己識嘅野,宜家開始做得有信心啲」。

參選過程中,林玉鳳稱看到澳門人雖仍偏向穩定保守派,但部分人不再懼怕政治,尤其新一代希望開放改變的力量愈來愈大,「𠵱家識嘢嘅人多咗,佢哋見到(社會)問題會唔抵得,但澳門體制有問題,自細屋企就同你講要做政府工或者做賭場,好似賭場吸哂啲人才,但未必係佢做番佢叻果樣嘢」。

林玉鳳指出澳門經濟不如香港多元,因此政治也較難多元,尤其依附政府及賭場工作的人更難獨立發聲。「澳門體制無允許好多中間獨立既專業人士可以好自由咁發聲,我已經係團隊中言論最自由嗰個。今日我哋有咁嘅能力,有咁嘅位置,我哋要盡力去做,唔夠膽講話會改變哂成個格局,但肯定會有改變」。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。