【職場警訊】真實個案:打工仔辭職後,老闆可以用到你幾盡?

撰文:詩寧
出版:更新:

上星期同大家分享咗少少「老闆會喺你交辭職信後魚肉你的招」,見到讀者留言話試過、話有同感有共鳴,我唔驚訝,因為你辭職之前佢都已經無理過你感受,辭職後進一步用盡你又有咩咁出奇?而令你意想不到嘅係,呢個世界原來有人「責任心重」,重到會因為一句好來好去而辭職後都繼續幫公司做義工……

幫幫手,走咗都返嚟教下手

有種老闆無乜應變能力,遇到下屬交辭職信,佢就只識慌張、惶恐、騰晒雞,好驚進行中嘅Project會無人接手,因為無人接就要佢自己做,而佢一向隊晒啲嘢比下面就撒手不管,你突然叫佢做返佢當然驚。為求自保,呢類型老闆嘅應對方法得一個:

「盡快請個新人返嚟!」

新人跟到進度當然好,跟唔到就比啲壓力佢,等佢做快啲/OT完成,新入職通常都希望自己能夠符合新公司嘅期望,所以都會出盡力去爭取表現,咁老闆又得逞。

不過,萬一新人真係有心無力咁點算?所以要留有後著,老闆會對交辭職信嘅員工非常好,唔止唔虐待佢,仲成日問住佢心情點呀?搵到新工未呀?祝佢新工事事順利前程錦繡.......目的只有一個:保持良好關係。

辭職後都繼續幫公司教新人?(視覺中國)

當新人搞唔掂嘅時候,希望舊人可以繼續解答問題,甚至係搵幾日返嚟坐喺新人隔離補習!

由於呢類老闆真係依賴慣,平時乜都唔知唔理,你叫佢教新人,佢連啲file save喺邊都唔知,點教呀?佢叫個舊人返嚟教,對佢有幾個好處:

1)老闆自己繼續乜都唔知,發吓夢等出糧

2)喺新人面前營造到同舊人關係好好,令新人覺得老闆對下屬都唔差

3)舊人幫新人上完補習班後,如果新人都係有嘢唔識,可以大條道理話個新人:

「舊人唔係教咗你咩?點解當時你唔明又唔問?而家你自己研究吓。」

你想問有無舊人會咁傻,走咗都返去開補習班?我答你,點會無!

總有人係好怕辭職後被唱,怕比人話佢無責任心(明明個責任應該同份糧一齊完咗);又有人性格係唔識拒絕人,明明係想同間公司終止關係先辭職,但比個老闆講多幾句就唔知點推,自然就會安慰自己,話做人要好來好去,捱多幾日啫,返去幫幫手啦。

受薪做得唔開心,不如幫公司做義工?

當你以為離職後返公司教新人夠搵笨嘅時候,更搵笨嘅係,你辭職嗰陣老闆同你講:

你好重要喎,可唔可以唔走呀?或者繼續幫幫手,幫到公司請到新人先走啦。

你好重要,但佢唔加你人工;你好重要,所以佢想你無條件地幫幫手。

朋友阿強,喺一間公司五年,佢一直好熱愛佢份工,好認真做,公司亦比好多「機會」佢,咩都比佢試(即係咩都比佢做),但就係唔加佢人工,阿強慢慢長大察覺到唔對路,佢終於辭職,公司好驚訝一個一直咁順攤、咁聽話、好使好用嘅員工竟然辭職,不停哄阿強希望佢留低,離職通知期一個月,周旋足一個月,最後阿強都係堅決辭職。講真阿強都唔係咁捨得公司,加上多位高層游說,佢都覺得公司好似幾睇重自己,內心一直希望公司講一句「加你人工」,咁佢就有下台階,可以答應留低。

但佢點都估唔到,公司個絕招竟然係同佢講:

反正你都未搵到新工,一星期返嚟兩三日幫吓手,當做吓義工吖?公司會盡快請人,到時你同新人交接完就可以走。
你好重要,請返來做義工。(視覺中國)

呢個時候阿強先猛然醒覺,聽到「義工」呢個「Offer」先知自己一直諗多咗,佢立即堅決辭職!感覺就好似比女神玩弄感情咁,女神一直同你行街睇戲傾心事,當你以為就快拖到佢隻手,點知佢只係派你一張好人卡。

做人係應該好來好去,但當要求或命令太過份的時候,請你企硬唔好Take!否則你自己蠢咗係一回事,做壞規矩害埋其他同事就大件事,老闆一次壓榨成功,就會試第二次,久而久之習以為常,惡性循環,打工仔「樽鹽」只會越來越少。

(本文純屬作者意見,不代表香港01立場。)