【塞夠未?】元朗Yoho Mall車龍倒灌 塞爆幾條街

撰文:
最後更新日期:

塞車的成因常為交通意外、路面改道,但原來有時塞車並非無可避免的結果,而是安排不當的後果。元朗有商場停車場出現車龍倒灌問題,不少車輛需輪候進入停車場,以致區內交通擠塞問題嚴重,困擾居民多時。

「Yoho Mall停車場入口得一個閘機,負荷都好大,變咗啲車排隊入去停車場,慢慢就塞到上博愛交匯處。」元朗區區議員王威信續道:「有時個閘機運作需要啲時間,或者有啲人喺入閘位搵多陣八達通,咁就會塞。」他形容,博愛交匯處為元朗市的「大門口」,故車龍一長、該處交通一擠塞,受礙的不止前往商場的市民,更是其他進入元朗區的市民。

元朗Yoho Mall停車場不時出現車龍倒灌的問題,引致交通擠塞。(元朗區區議員王威信提供)

受影響的不只是博愛交匯處,車龍更會倒灌至朗日路交通交匯處、往九龍的行車方向:「佢一塞就塞住青山公路、朗日路,Grand Yoho個巴士站出口都畀佢塞住,頂住晒啲巴士出唔到。」王威信說,不少區內居民都戲稱,乘坐巴士到區外,往往要花不少時間,才能「衝出元朗」。

交通問題以星期5、6、日的午飯、晚飯時間最為嚴重,王威信指商場有嘗試作出臨時措施,疏導車輛,但他認為仍有問題存在:「而家商場一見到車多,就會即刻叫車離開,掉頭去元龍街排隊,但都仲係有好多交通問題,影響到Yoho Town嗰邊行人過路安全。」

輪候進入商場停車場的車龍不時倒灌回博愛交匯處。(Yoho Mall網頁)

針對此問題,王威信於今年2月已呈文件上區議會,要求運輸署及商場跟進問題,惟一直無法解決。「而家個情況好唔理想,因為塞嘅係公眾地方、政府路,唔suppose畀你咁樣排隊。」他續說:「其實而家都未可以充分反映到真實情況,因為商場入面重有200個住宅車位未租出去,再加上未來市民對商場嘅需求,果唔預早做定一啲措施,未來個問題會更嚴重。」

王威信認為,商場的停車場應作出小改動,加入車輛緩衝區:「好多商場停車場嘅閘口都會分佈喺幾層,防止得一個門口,畀人頂實,上面嘅通道就可以當做一個緩衝,唔會一嚟就塞住晒。」除此以外,他認為運輸署可於往九龍方向出口的位置加上黃格及其他路標,管制該處車流,以減擠塞情況。

運輸署回覆《香港01》指,曾接獲相關投訴,署方現時已於涉事的公共道路設置24小時不准停車限制區(即雙黃線),並要求警方加強執法。署方又指,已要求該停車場的管理公司改善停車場運作及私家路排隊進入停車場的安排,管理公司亦已加強停車場的人手安排,令車龍情況得以紓緩。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。