【iPhone XS Max開賣】果農料炒燶 先達店舖：細機最少低300元收
每年9月中均為全港iPhone迷及「果農」最期待的日子。iPhone XS 及XS Max將於明日（21日）正式發售及可取貨，惟官方網站現時仍有現機發售，預計炒風不復當年。
《香港01》記者今日（20日）率先到旺角先達廣場查詢，雖然有店舖展示未填上收機價的展示板，但不約而同説，簡稱「細機」的iPhone XS的收機價，未開賣已跌穿原價，最少低300元，只有iPhone XS Max仍有數百元以上水位，明日中午前可望一機賺450元。手機王國負責人說：「大機（iPhone XS Max）大陸收都係12,800元，我可以畀多幾多啲客？細機就唔好諗啦，廠大把有貨，我哋都唔預有得賺啦！」
記者問放售價 店員反叫買機
新iPhone明日開賣，不少果迷及果農引頸以待，盼可第一時間取得新機。每年均有不少人選擇將手機放售賺取差價，惟有回收電話的商舖表明，今年內地同為首賣地，加上貨源充足，對iPhone炒賣不抱任何信心。
《香港01》記者今日到先達廣場向收手機店舖查詢，有店員聞言即説：「細機（iPhone XS)唔洗諗（放售），落地跌最少300元。」並反推介記者出機，指現時64GB的iPhone XS售價8,800元，即較官方價貴201元。
大機料有水位賺 中午前放售最佳
手機店「COMEQIN」負責人黎偉明則説，現時仍收到大機iPhone XS Max的內地訂單，主要為黑色及金色的256GB及512GB手機，相信果農放售價最少仍有約450元「水位」賺；但iPhone XS手機收機價已跌穿原價，但一切要以明日的確實情況為準。
放機也會夠快，黎説：「聽日中午12點前應該仲有得炒，要放就盡早啦，先達開10點，但如果聽日內地突然要貨都可炒一陣。細機我而家就咁買都買到，點炒？好似波鞋咁無貨就可以炒啫，但佢（蘋果）今年推咁多出嚟。」
金色「大機」512GB或可賺$1,501
另外，一向有不少果農前來放機的「手機王國」，其負責人曾小姐同樣表示，預計明日的市況跟以往相比慘淡得多，雖一切價格以明日出售時作準，不會再度大量入手。她坦言，iPhone XS 64GB及256GB現收8,250元及9,500元，均跌破原價，分別少349元及399元；只有金色iPhone XS Max 512GB可達14,000元，較官方價高1,501元，其餘兩款顏色則為12,800元，僅高301元，「咁多年來我哋第一次一隻都唔要住，寧願睇吓聽日有冇平貨收就要少少，今年太多貨炒唔到啦。」但她仍笑說，明日將會準時早上10時回店，有意放機的果農可嘗試碰碰運氣。
