【社區人.訪】首創香港滑雪品牌 70後港男成日本台灣滑雪代言人

撰文:
最後更新日期:

香港長年沒有降雪,卻有不少滑雪愛好者,每逢假期到外地的滑雪場飛馳。40多歲的港男陳立佳迷上這運動,不但考取了滑雪教練牌,更放下多年廣告設計的工作,數年前創立了香港第一個本土滑雪品牌,連日、台兩地都相繼找他合作宣傳滑雪。

在難談夢想的地方,陳立佳人到中年以興趣開拓第二人生,雖未必成功,但起碼對得起自己。

9年前初次接觸滑雪,之後阿佳考取滑雪教練牌照,將滑雪當成職業。

阿佳本來是名廣告設計人,現時卻是滑雪教練和滑雪品牌創辦人。

「有朋友問我有冇興趣滑雪,當時我諗:滑雪?點玩㗎?」年過40的阿佳本來從事廣告設計,9年前跟隨朋友到日本新潟縣玩snowboard(單板滑雪),最初只是玩票性質,沒想到會改寫人生。

他說,起初以為滑雪很容易,似踏單車「跌兩跌就識」,事前只看了數段網上影片參考。「點知玩咗一日,第二日除了眼球同肌肉可以郁,其餘全身攰到郁唔到!」他在日本玩了5日雖然仍「完全唔識」,卻又覺得這玩意相當刺激。

滑雪跌斷肋骨

自此之後,阿佳每年都跟隨朋友出團滑雪,第3年卻在加拿大的滑雪場遇上意外。「嗰次同朋友交換咗塊板嚟試,加上本身技術未夠,衝落山時向前仆,心口落地砸斷咗肋骨。」他竟沒有停下來,繼續忍痛玩了3日,「回程時已經頂唔順, 痛到跪咗喺度,返香港睇醫生,喺屋企瞓咗3個月。 嗰3個月冇咩好做,我對住天花板時就諗:唔得!我一定要認真將呢件事玩得好,仲要玩得比我啲朋友好!」

工作、興趣都與滑雪有關,阿佳指滑雪是他人生全部。(受訪者提供)

阿佳找教練指導滑雪訣竅和動作,每逢周六到深圳「世界之窗」練習,期間又不時前往日本妙高市大型滑雪場實地挑戰,2015年先後考取加拿大CASI和日本SAJ兩個專業教練牌照,更獲日本妙高市觀光局邀請,成為香港區「代言人」,在香港為當地宣傳滑雪和行山體驗。

興趣變職業  

阿佳指,過去雖然為廣告公司做freelance設計工作,但因工時很長,數年來獨自困在小小工作間,令他感到「自閉」和抑鬱,「有段時間朝早10點爬起身,牙都唔刷就捐入工作間對住電腦做嘢,一路做到翌日凌晨4點,10幾個鐘完全冇人同我講嘢。」他形容,當時用不快樂的生活換取金錢,直至接觸滑雪後,大幅減少廣告工作,才真正獲得「自由」,「𠵱家滑雪可以通山走,工作又可以成日同人溝通,感覺好放鬆。」

4年前,阿佳創立了香港第一個本土滑雪品牌。(受訪者提供)

4年前,阿佳創立了品牌「Temporary Worker Snowboard」(TWSB),專門設計和製造滑雪衣物和周邊產品,他希望品牌能傳達正能量,給予滑雪人士在挫折過後重新上路的勇氣。「開心嘅時間係好短暫,相反唔開心都係暫時性,總會過去。」

他的品牌以懷舊和工人服風格為主,除了外套、帽子、吸汗T恤等,近年更與香港、台灣兩個滑雪團體合作,設計出以電影《英雄本色》為概念、屬於香港人的滑雪板。「我哋專登加啲大圖案喺件衫上面,希望大家去到唔同國家,喺雪地上面一睇,就睇到呢件係香港人做嘅衫。」

品牌名叫「Temporary Worker」,原來有意思。「除咗因為自己都係臨時工,亦因為我哋開心嘅時候,係好短暫,相反唔開心都係暫時性,總會過去。我希望透過品牌,令大家都盡情開心,唔開心亦搵到勇氣再出發。」

不與錢掛鈎

創立品牌初期,因過去未有服務設計經驗,阿佳要走遍深水埗,不斷詢問和摸索。雖然只是小本生意,但每年都要投資上10萬8萬,幸好獲得家人支持,「可能未結婚,可以無後顧之憂向前衝。屋企人見我以前好頹,𠵱家成個人開朗咗,都好開心見到我呢個轉變。」

阿佳承認,香港的滑雪用品市場仍然很小,現階段還「蝕緊錢」,只能靠教滑雪或接廣告設計工作等來幫補收入。雖然未知前景如何,卻坦言「冇所謂」,「唔同錢掛鈎,先至係快樂嘅滑雪。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。