【書商失蹤】林榮基遊行發言全文「國家想收窄香港人自由」

銅鑼灣書店店長林榮基遊行前感言：

呢件事畀我好大感觸，香港人一直都河水不犯井水，呢一次好明顯，一間小書店本來喺有言論自由出版嘅地方，一個香港嘅地方，呢個係法例保障㗎，佢竟然可以通過國家暴力想辦法去摧毀呢間書店，事實其實擺在眼前，我知道香港人唔滿意嘅就係呢一點，因為佢好明顯想逐步收窄我哋香港人嘅自由。

我哋其實想安居樂業喺到，你睇睇李波，人雖然喺香港，但係佢依然被背後操縱，因為佢內地亦都有親人，我知道佢講好多違心嘅說話，但我好理解，如果有能力我會幫佢，我希望大家香港人都會幫佢。

李波呢件事呢，李波依家雖然身在香港，但佢缺少我哋應該有嘅，譬如免於恐懼嘅自由，佢喪失咗，呢樣大家都知道，我希望呢一次嘅事件，將來我哋要面對另外一啲事嘅時候，香港人亦都要站出嚟 ，唔係因為呢件事完結就無。

譬如免於恐懼嘅自由，佢（李波）喪失咗。

我知道大家都要搵食，譬如金鐘事件（2014年佔領行動），我前前後後都落咗去睇過三四次，點解？我當然啦，關心我同情啲學生，學生其實係為香港人着想。點解我日頭唔去呢？我無辦法去，我要開舖，我都係要收工二點落去金鐘睇，其實大多數香港人都係一樣，為咗生計忙碌，好多時唔會參與政治。點解呢？因為生活壓力太大，但佢地嘅心中係默默關注嘅。

為咗生計忙碌，（香港人）好多時唔會參與政治 ......但佢地嘅心中係默默關注嘅。

《環球時報》、甚至曾鈺成，我今日睇到有佢嘅談話，佢話我好叻仔，我其實唔叻㗎，我只係照事實講出嚟 ，佢哋習慣用顯微鏡睇事物嘅人呢，往往有陰謀論嘅。細菌有無陰謀啊？無，但佢自己斟出來有陰謀，所以啲水佢哋唔敢飲，係我哋普通香港人敢飲，價值觀就喺呢到。

一個人習慣睇事物用顯微鏡睇嘅時候，佢就會擔心。